منتخب حکومت کیخلاف سازش عیاں ہوچکی :تحریک انصاف
اسلام آباد(خصوصی نیوز رپورٹر)پاکستان تحریک انصاف نے کہاہے کہ جمہوریت اور عوام کے مینڈیٹ پر ڈالے جانے والے ڈاکے کی پوری تفصیلات خود سازش میں ملوث کردار کھول کھول کر قوم کے سامنے رکھ رہے۔۔۔
مسلم لیگ ن کے رہنما رانا ثنا اللہ کا سابق آرمی چیف کی مدّتِ ملازمت میں توسیع اور تحریک انصاف کی منتخب حکومت کیخلاف سازش کے حوالے سے بیان پر تحریک انصاف کے ترجمان نے رانا ثنا کے بیان کو رجیم چینج سازش کے مکروہ مقاصد اور اس میں ملوث کرداروں کے گھناؤنے پن کے حوالے سے پی ٹی آئی چیئرمین کے مو قف کی تائید و توثیق قرار دے دیا۔پی ٹی آئی ترجمان نے کہا کہ ملک میں منتخب جمہوری حکومت کیخلاف بند کمروں میں کی گئی سازش اور اس میں ملوث کرداروں کی حقیقت ہر زاویے سے قوم کے سامنے عیاں ہوچکی ،پی ڈی ایم حکومت کا وزیرِدفاع برملا اعتراف کرچکا کہ غیر جمہوری و غیرسیاسی عناصر ابتدا ہی سے تحریک انصاف کی حکومت کیخلاف سازشوں میں مصروف تھے ، دی انٹرسیپٹنے امریکا میں پاکستانی سفیر کے بھجوائے خفیہ مراسلے کا متن چھاپ کر رجیم چینج سازش میں کارفرما عوامل دنیا پر آشکار کئے ۔ ترجمان نے کہاکہ سابق وزیراعظم کے پرزور اصرار کے باوجود اس خفیہ مراسلے کی روشنی میں سازش کی اعلیٰ سطحی عدالتی تحقیقات سے اجتناب کرکے سازشیوں اور سہولت کاروں کو بچانے کی کوشش کی گئی،ریاست اپنے ذمے قوم کا قرض ادا کرے اور دستور، جمہوریت، عوام کے مینڈیٹ اور معیشت و سیاست کو ذبح کرکے ملک کو بدترین بحرانوں کے سپرد کرنے والوں کے محاسبے کا اہتمام کرے ۔
