بجلی چوری پکڑنے پر ایکسین کمالیہ کے دفتر پر دھاوا،توڑ پھوڑ
فیصل آباد، کمالیہ (نیوزرپورٹر، نمائندہ دنیا ) فیسکو ٹیم پر حملہ پر فیسکو ریجن میں دہشت گردی کی دفعات کے تحت پہلا مقدمہ درج کرلیاگیا ہے ۔بجلی چوری پکڑنے پر 6مسلح افراد نے ایکسین کمالیہ کے دفتر پر دھاوا بول دیا ۔
دفتر میں توڑپھوڑ کی اور عملہ سے گالم کلوچ کرتے ہوئے سرکاری فائلیں پھاڑدیں ،اسلحہ لہراتے رہے اور پولیس کے آنے پر فرارہوگئے ۔پولیس تھانہ صدر کمالیہ نے کارسرکارمیں مداخلت ، دہشت گردی کی دفعات کے تحت مقدمہ درج کرلیاہے ۔واقعات کے مطابق سٹی سب ڈویژن کمالیہ کی ٹیم نے وہاب والی پلی پر ایک شخص مظہر اقبال ولد شمشیرکی بجلی چوری پکڑی تھی اور اس کا میٹر اتارلیا ۔ اس پر مظہر اقبال کے بھانجوں خالد عمران،عابد عمران اور ان کے ساتھی مدثر اور تین نامعلوم مسلح افرادنے ایکسین فیسکو کمالیہ ڈویژن کے دفتر پر حملہ کیا۔وقوعہ کے وقت ایگزیکٹو انجینئر فضل عباس شاہ،ایس ڈی او سٹی کمالیہ ذوالفقار علی کاٹھیا ،ایس ڈی او رورل سب ڈویژن کمالیہ محمد عمران،لائن سپرنٹنڈنٹ اسحاق اور کمپیوٹر آپریٹر تنویر حسین میٹنگ کے سلسلہ میں دفترمیں موجود تھے ۔مذکورہ افراد نے دفتر میں داخل ہوکر دھمکیاں دیں،گالیاں دیتے ہوئے توڑ پھوڑ کی ،فائلیں پھاڑ دیں اور اسلحہ لہرایا ۔پولیس کو کال کرنے پر ملزم کار میں بیٹھ کر فرار ہوگئے ۔پولیس تھانہ صدر کمالیہ نے دہشت گردی کی دفعات،کارسرکارمیں مداخلت ،دھمکیاں دینے پر مقدمہ درج کرلیاہے ۔ ادھر کمالیہ بار نے ایف آئی آ ر کو من گھڑت قرار دیتے ہوئے آ ج ہڑ تال کا اعلان کر دیا ہے ۔
