حج پالیسی 10روز میں کابینہ کو بھیجیں گے ،انیق احمد
اسلام آباد (اپنے رپورٹرسے )نگران وزیر مذہبی امور انیق احمد نے کہا ہے کہ وزارت مذہبی امور نے حج پالیسی بارے ہوم ورک مکمل کرلیا جسے وفاقی کابینہ سے منظوری کے لئے آئندہ 10روزمیں بھیجا جائے گا۔
ان خیالات کا اظہار انہوں نے میڈیا سے گفتگو کرتے ہوئے کیا ،وزیرمذہبی امور نے کہا کہ گزشتہ برس حج پالیسی میں تاخیرسے کئی مسائل پیش آئے ، اب تاخیر نہیں ہوگی ،حج پالیسی میں 40 روزکے حج سمیت کم مدت کا حج بھی شامل ہوگا، اب پاکستانی حاجی گم نہیں ہوں گے ،عازمین حج کو مخصوص رنگ اور ڈیزائن کے 2 سوٹ کیس دیئے جائیں گے ،سوٹ کیس پر کیو آر کوڈ کی صورت میں عازمین حج کے کوائف موجود ہوں گے ،سوٹ کیس پرنام،پاسپورٹ نمبر،رہائشگاہ،مکتب نمبرسمیت دیگرمعلومات درج ہوں گی، عازمین حج اب ہر وقت پاکستان میں اہل خانہ سے رابطے میں رہ سکیں گے ،عازمین کو پہلی بار خصوصی موبائل پیکیج دیاجائے گا،سعودی عرب کی موبائل فون کمپنی سے معاہدہ طے پا گیا ہے ، پاکستانی عازمین رومنگ کے بغیرہی موبائل فون پرآڈیو،ویڈیوکال کرسکیں گے ،چار ہزارروپے کے موبائل پیکیج سے پاکستان لامحدود بات ہوسکے گی۔
