توہین آمیز مواد کیس:لاہور ہائیکورٹ نے نگران وزیراعظم،وزیراعلیٰ پنجاب کو طلب کر لیا
لاہور (کورٹ رپورٹر)توہین آمیز مواد شائع کرنے کے کیس میں لاہور ہائیکورٹ نے وزیراعظم اور وزیراعلیٰ پنجاب کو عدالت طلب کر لیا۔
تفصیلات کے مطابق لاہور ہائیکورٹ میں قرآن پاک کے ترجمے میں تحریف ، قرآن بورڈ کی اجازت کے بغیرقرآن چھاپنے اور توہین آمیز مواد سوشل میڈیا سے نہ ہٹانے کے اقدام کیخلاف درخواست پر سماعت ہوئی،جسٹس شجاعت علی خان نے نگران وزیراعظم انوار الحق کاکڑ اور نگران وزیراعلیٰ پنجاب محسن نقوی کو 16 اکتوبر کو پیش ہونے کا حکم دے دیا۔ عدالت نے وفاقی اور پنجاب حکومت کے وکلا کے جواب پر عدم اطمینان کا اظہار کرتے ہوئے ریمارکس دئیے کہ 8 ماہ سے وفاقی حکومت کی رپورٹ نہیں آئی،وفاق کے وکیل کی جانب سے مہلت مانگنے پر عدالت نے برہم ہوکرکہا کہ آپ یہاں سیر کرنے آئے ہیں، کیوں رپورٹ جمع نہیں ہوئی ؟ یہ کیس ہم سب کا ہے ،ہم حکم پر عملدرآمد کرائیں گے ،عدالت نے برہمی کا اظہار کرتے ہوئے کہا کہ ہم ملک کے چیف ایگزیکٹو کو بلا لیتے ہیں، نگران وزیراعظم آ کر خود جواب دیں، لگتا ہے نگران وزیراعظم کے سامنے معاملہ رکھا ہی نہیں گیا، آپ سنجیدہ ہوتے تو ہمیں کوئی رپورٹ جمع کرواتے ، نگران وزیراعظم پیش ہو کر اپنی پوزیشن واضح کریں۔
