پرویزالٰہی کیس :افسروں کو جرمانے :حکومتی درخواست پر آج وکلا سے مزید دلائل طلب
لاہور (کورٹ رپورٹر) لاہور ہائیکورٹ کے جسٹس سلطان تنویر احمد نے آئی جی پنجاب پولیس،ہوم سیکرٹری اور آئی جی جیل خانہ جات کو جرمانے اور شوکاز نوٹس کے فیصلے کیخلاف حکومتی درخواست پر آج وکلا سے مزید دلائل طلب کرلئے۔
عدالت نے تینوں افسروں کو جرمانہ کرنے اور شوکاز نوٹس پر عمل درآمد معطل کرنے کے حکم میں توسیع کر دی،سرکاری وکیل نے موقف اپنایا کہ پرویز الٰہی کو قانون کے مطابق مقدمات میں گرفتار کیا گیا ، استدعا ہے کہ عدالت ٹرائل کورٹ کے جرمانہ اورشوکاز نوٹس پر عمل درآمد معطل کرے ۔ لاہور ہائیکورٹ کے جسٹس سلطان تنویر احمد نے 3 مقدمات میں سابق وزیر اعلیٰ پنجاب پرویز الٰہی کو مقدمات سے ڈسچارج کرنے کیخلاف پنجاب حکومت کی درخواست پر وکلا سے مزید دلائل آج طلب کرلئے ،درخواست میں موقف اپنایا گیا کہ پرویز الٰہی کیخلاف شواہد موجود ہیں، متعلقہ ججز نے حقائق کے برعکس فیصلے دئیے ، استدعا ہے کہ عدالت جوڈیشل مجسٹریٹ کا مقدمات خارج کرنے کا اقدام غیر آئینی قرار دے ۔لاہور ہائیکورٹ کے جسٹس شہرام سرور چودھری کی سربراہی میں دو رکنی بینچ نے بینکنگ جرائم کورٹ کی جانب سے راسخ الٰہی ،زارا الٰہی اور تحریم الٰہی کی عبوری ضمانتیں منظور کرنے کے اقدام کیخلاف ایف آئی اے کی اپیل پر فریقین کو نوٹس جاری کر دیئے ، عدالت نے وفاقی حکومت کو جواب داخل کرانے کیلئے مہلت دیدی،ایف آئی اے نے موقف اپنایا کہ عدالت نے خلاف قانون منی لانڈرنگ کے مقدمے میں ضمانتیں منظور کیں ، ملزمان کیخلاف ثبوت موجود ہیں ضمانتیں خارج کی جائیں۔
