پی ٹی آئی کی قانونی ٹیم میں اختلافات سامنے آگئے
اسلام آباد( مانیٹرنگ ڈیسک ، نیوز ایجنسیاں) تحریک انصاف کی قانونی ٹیم کے ممبران شیر افضل ایڈووکیٹ اور شعیب شاہین کے درمیان اختلافات کھل کر سامنے آگئے ۔
ایڈووکیٹ شیر افضل مروت نے کہا ایکس پر اپنے ایک بیان میں ایڈووکیٹ شعیب شاہین پارٹی کی قانونی ٹیم میں واحد غدار ہیں ۔ شیر افضل مروت نے کہا کہ میں نے پی ٹی آئی کی قانونی ٹیم کے غداروں کے بارے میں پہلے والی ٹویٹ کی تھی تاہم کور کمیٹی کے سینئرز کے مشورے کے بعد میں نے وہ حذف کردی تھی۔ آج جمعرات کو چیئرمین پی ٹی آئی سے ملاقات کروں گا اور انہیں اپنے اس ٹویٹ کے بارے میں آگاہ کروں گا ، میرے الفاظ پر نشان لگائیں یہ ٹویٹ بہت سے مجرموں اور ایجنٹوں کو تنگ کرے گا۔دوسری جانب شیر افضل مروت کے الزامات کے جواب میں شعیب شاہین نے کہا کہ میں نے سپریم کورٹ میں سوشل میڈیا سے گفتگو میں کہا تھا جو شخص پارٹی میں تفرقہ پیدا کرے وہ پی ٹی آئی سے نہیں ہوسکتا، میں نے سپریم کورٹ میں شیر افضل مروت سے متعلق پوچھے گئے سوال کا جواب دیا تھا۔شعیب شاہین نے کہا کہ پارٹی نے پانچ ترجمان نامزد کیے ہیں ان میں سے ایک میں ہوں، میرا مؤقف ہی پی ٹی آئی کا مؤقف ہے جبکہ شیر افضل کے الزامات انکی ذاتی رائے ہے پارٹی کا موقف نہیں ہے ۔پی ٹی آئی ترجمان نے کہا کہ تحریک انصاف شیرافضل مروت ایڈووکیٹ کی ٹویٹ کے مندرجات سے ہرگز اتفاق نہیں کرتی، تحریک انصاف کی قانونی ٹیم نامساعد اور مشکل ترین حالات میں نہایت محنت، لگن اور جانفشانی سے چیئرمین تحریک انصاف ، قائدین اور کارکنوں کے مقدمات لڑ رہی ہے ۔ شعیب شاہین ایڈووکیٹ تحریک انصاف کی قانونی ٹیم کے نہایت قابلِ احترام ممبر ہے ۔تحریک انصاف شعیب شاہین سمیت اپنی قانونی ٹیم کے ہر رکن کی خدمات کو نہایت قدر و تحسین کی نگاہ سے دیکھتی ہے ۔ترجمان پی ٹی آئی نے کہا کہ شیر افضل مروت کا شعیب شاہین سے متعلق ٹوئٹ اُن کی ذاتی رائے ہوسکتی ہے ۔ترجمان نے مزید کہا کہ شیر افضل مروت کے بیان کے مندرجات سے ہرگز اتفاق نہیں کرتے ، پارٹی کی قانونی ٹیم مشکل حالات میں مقدمات لڑ رہی ہے ۔
