ایم ڈی کیٹ :نقل کیلئے اڑھائی ارب لئے گئے :نگران وزیر
پشاور(مانیٹرنگ ڈیسک)خیبرپختونخوا کے نگران وزیراطلاعات بیرسٹر فیروز جمال نے کہا ہے کہ میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ )میں طالب علموں سے نقل کیلئے بڑے پیمانے پر رقوم وصول کی گئیں۔
ایک طالب علم سے 35 لاکھ روپے کے حساب سے رقم وصول کر کے بلیو ٹوتھ ڈیوائسز فروخت ہوئیں،اڑھائی ارب سے زائد روپے اس سکینڈل میں لیے گئے ہیں،اب تک 400 افراد کی نشاندہی ہو چکی ہے جبکہ اطلاعات کے مطابق 800 افراد اس میں ملوث تھے ،فیروز جمال کے مطابق ٹیسٹنگ کے اس نظام کا از سرنو جائزہ لینا ہو گا اور جہاں غلطی ہو، اسے درست کرنے کی ضرورت ہے ۔ایم ڈی کیٹ میں پاکستان کے دیگر شہروں میں بھی بڑے پیمانے پر گھپلے ہو رہے ہیں، ایم ڈی کیٹ سکینڈل میں ملوث افراد کو عبرت ناک سزا دی جائے گی،صوبے میں امن و امان کی صورتحال بہتر ہے الیکشن کی تاریخ جب بھی ملے ہم تیاری کریں گے ، خیبر پختونخوا میں بھتہ خوری کے واقعات کی تفتیش کیلئے الگ ونگ قائم کیا گیا ہے جو جدید طریقوں سے نامعلوم فون کالز کو ٹریس کرے گا، غیر استعمال شدہ یا کبھی کبھار استعمال ہونے والی سِمز بلاک کرنے کی ہدایت کی گئی ہے ، انہوں نے بھتہ خوروں کے اہم گینگ تک رسائی حاصل ہونے کا دعویٰ بھی کیا۔بیرسٹر فیروز کا کہنا تھا کہ کسی کو بھی غیرقانونی طریقے سے رہائش کی اجازت نہیں۔ اس لیے غیر رجسٹرڈ افغان باشندوں کی جانچ پڑتال کے بعد ڈی پورٹ کیا جا رہا ہے جبکہ طورخم بارڈر پر غیرقانونی شہریوں کی آمدورفت پر کڑی نگرانی کی جا رہی ہے ،انہوں نے ڈالر سمگلنگ سے متعلق بتایا کہ حوالہ ہنڈی اور غیرقانونی کرنسی کا کاروبار کرنے والوں کے خلاف گھیرا تنگ کیا ہے ، اسی وجہ سے ڈالر کی قیمت میں استحکام آیا ہے ، سونا سمگلرز کے خلاف بھی کارروائی کی جا رہی ہے ۔
