موسم سرما میں گھر یلوصارفین کو3 ٹائم گیس ملے گی،لوڈ مینجمنٹ کی تیاری
اسلام آباد(نمائندہ دنیا)آنے والا موسم سرما بھی گیس صارفین کیلئے مشکل ہوگا، شارٹ فال ایک ارب کیوبک فٹ یومیہ تک پہنچنے کا اندازہ، گیس کمپنیوں نے ابھی سے لوڈمینجمنٹ پلان کی تیاری شروع کردی۔
ذرائع کے مطابق آئندہ موسم سرما میں گیس کی مقامی پیداوار 3 ارب 60 کروڑ کیوبک فٹ یومیہ رہنے کا امکان ہے جبکہ ایک ارب کیوبک فٹ ایل این جی درآمد کرنے کی منصوبہ بندی کی جائے گی۔ اس طرح موسم سرما میں پونے 5ارب کیوبک فٹ گیس یومیہ دستیاب ہوگی جبکہ زیادہ سے زیادہ طلب ساڑھے 6 ارب کیوبک فٹ یومیہ رہنے کا تخمینہ ہے ۔ اس طرح صارفین کو ایک ارب کیوبک فٹ یومیہ شارٹ فال کا سامنا کرنا پڑے گا۔ اس صورتحال کے پیش نظر گیس کمپنیوں نے لوڈمینجمنٹ پلان کی تیاری شروع کردی۔ ذرائع کے مطابق گیس لوڈمینجمنٹ پلان کو اکتوبر کے وسط تک حتمی شکل دے دی جائے گی۔ وفاقی حکومت سے منظوری لینے کے بعد پلان نومبر سے آئندہ سال مارچ تک نافذالعمل ہوگا۔ مجوزہ پلان کے تحت موسم سرما میں گھریلو صارفین کو گیس کی فراہمی پہلی ترجیح ہوگی۔ گھریلو صارفین کیلئے صبح، دوپہر اور شام کے اوقات میں گیس کی لوڈ شیڈنگ نہیں کی جائے گی۔پاور سیکٹر کو گیس کی فراہمی دوسری ترجیح ہوگی۔ عام صنعتوں کیلئے گیس کی فراہمی کے اوقات مقرر کئے جائیں گے ۔ سی این جی سیکٹر کو گیس کی فراہمی دستیابی سے مشروط ہوگی۔ زیرو ریٹڈ صنعتوں کو گیس کی لوڈ شیڈنگ سے مستثنٰی کئے جانے کا امکان ہے ۔
