پی ٹی آئی کے رہنما لاپتہ رہائی تک انتخابات شفاف نہیں ہونگے :عمر ایوب
لاہور/اسلام آباد (سیاسی رپورٹرسے ،صباح نیوز )پاکستان تحریک انصاف نے نگران وزیراعظم اور چیف الیکشن کمشنر کو ارسال خطوط میں اپنے لاپتہ ذمہ داران اور کارکنان کی بازیابی کا مطالبہ کردیا ۔
پی ٹی آئی کے سیکرٹری جنرل عمر ایوب خان نے نگران وزیر اعظم اور چیف الیکشن کمشنر کے نام تحریر الگ الگ خطوط میں کہا ہے کہ تحریک انصاف کے رہنما فرخ حبیب، صداقت عباسی، عثمان ڈار، اویس یونس، عرفان سلیم، عبدالکریم خان اور عوامی مسلم لیگ کے سربراہ شیخ رشید کئی روز سے لاپتہ ہیں،ان تمام افراد کی جبری گمشدگیاں بنیادی حقوق کی خلاف ورزی ہے ،جب تک مذکورہ افراد کو رہا اور گمشدگیوں کے ذمہ داران کو کٹہرے میں نہیں لایا جاتا آئندہ عام انتخابات کی شفافیت پر سوالیہ نشان رہے گا، امید ہے معاملے کو سنجیدگی سے دیکھتے ہوئے متعلقہ اداروں کو ان کی فوری بازیابی کے احکامات جاری کیے جائیں گے ۔ ان خطوط کی نقول چاروں نگران وزرائے اعلیٰ کو بھی بھجوا دی گئیں۔
