مناسب وقت پر ہی انتخابات کروائے جائیں:فضل الرحمن
میانوالی،کمر مشانی(ڈسٹرکٹ رپورٹر ،نامہ نگاران )جے یو آئی کے مرکزی امیر مولانا فضل الرحمن نے کہا ہے کہ الیکشن کے بجائے پہلے ملکی معیشت کو سنبھالا دیا جائے ،مناسب وقت پر ہی انتخابات کروائے جائیں، دہشت گردی کے خلاف قوم اور ادارے مل کر کام کریں۔
ملک میں چھپے اور ظاہر سب دہشت گردوں کا سر کچل دیا جائے ، معصوم لوگوں کا ناحق خون بہا کر یہ دہشت گرد جنت نہیں جہنم کے نچلے گڑھے میں جائیں گے ، مستونگ اور ہنگو کے بم دھماکوں پر دل خون کے آنسو رو رہا ہے ،حالات ،وقت اور موسم جنوری میں الیکشن کا متحمل نہیں ہو سکتا، دو صوبوں کے پی کے و بلوچستان کی عوام سخت سردی میں ووٹ نہیں ڈال سکے گی، ان خیالات کا اظہار انہوں نے یہاں خانقاہ سراجیہ میانوالی میں سجادہ نشین حضرت خواجہ خلیل احمد اور ضلعی صدر جے یو آئی خواجہ نجیب احمد سے ملاقات میں کیا، انہوں نے کہا کہ اسوقت ملک میں جاری دہشت گردی کی لہر کو کنٹرول کرنا وقت کی اہم ضرورت ہے ، قوم ،آرمی، پولیس اور دیگر ادارے مل کر اس دہشت گردی کا مقابلہ کریں، دہشت گرد ملک وقوم کے دشمن ہیں ان کا ہنگامی بنیادوں پر خاتمہ کرنا ضروری ہے ، جے یو آ ئی ملک بھر میں الیکشن میں حصہ لے گی، ہم خیالوں سے مل کر اتحاد و سیٹ ایڈجسٹمنٹ بھی ہو سکتی ہے اور الگ بھی ہم الیکشن لڑ سکتے ہیں ۔
