دوران ڈیوٹی سرکاری ملازم کے انتقال پر لواحقین کو پولیس شہدا پیکیج ملے گا: محسن نقوی
لاہور(سیاسی رپورٹرسے )کسی بھی سرکاری محکمے میں ڈیوٹی کے دوران شہید ہونے والے افسر یا ملازم کے لواحقین کو پولیس شہدا پیکیج کے برابر امدادی پیکیج دیاجائے گا۔
وزیراعلیٰ پنجاب محسن نقوی نے سرکاری محکمو ں کے شہیدہونے والے ملازمین کے لواحقین کے لئے پولیس شہدا پیکیج کے برابر امدادی پیکیج دینے کی اصولی منظوری دے دی۔زخمی سرکاری ملازم کو بھی پولیس پیکیج کے برابر امدادی پیکیج دیا جائے گا۔محسن نقوی نے اس ضمن میں ایڈیشنل چیف سیکرٹری کی سربراہی میں کمیٹی تشکیل دینے کی ہدایت کی۔کمیٹی حتمی سفارشات تیار کرے گی اور کیسز کا جائزہ لے گی۔
وزیر اعلیٰ محسن نقوی کی زیر صدارت کابینہ سٹینڈنگ کمیٹی برائے فنانس اینڈ ڈویلپمنٹ کا13واں اجلاس ہوا جس میں دوران ڈیوٹی شہید ہونے والے ایکسائز انسپکٹر محمد رفیع کے لواحقین اور زخمی انسپکٹر ثناء اللہ بھٹی کے لئے مالی امداد کا کیس پیش کیاگیا۔وزیراعلیٰ نے مالی امداد کے کیس پر فوری نظر ثانی کا حکم دیا اور امدادی پیکیج کو پولیس شہداء پیکیج کے برابر کرنے کی ہدایت کی۔وزیراعلیٰ نے محکمہ ایکسائز کے شہید انسپکٹرمحمد رفیع کے لواحقین اور زخمی ایکسائز انسپکٹر ثناء اللہ بھٹی کے لئے پولیس پیکیج کے برابر پیکیج کی منظوری دی۔
واضح رہے کہ رحیم یار خا ن میں منشیات فروش کی فائرنگ سے ایکسائز انسپکٹر محمد رفیع شہید جبکہ انسپکٹر ثنا ء اللہ بھٹی شدید زخمی اور معذور ہوگئے تھے ۔وزیراعلیٰ پنجاب محسن نقوی نے زیر تعمیربند روڈ کنٹرولڈ ایکسس کوریڈورپراجیکٹ کا دورہ کیا اور منصوبے کی سائٹ پر جاری ترقیاتی کاموں کا معائنہ کیا اور میگا پراجیکٹ پر پیش رفت کا جائزہ لیا۔پراجیکٹ کے پیکیج ون کے کوریڈور کے اطراف دیواروں کی تعمیر کے کام کامشاہدہ کیا۔وزیر اعلی ٰنے پیکیج 2 کے کوریڈور کی دیواروں کا کام تیز کرنے کے حوالے سے پیکیج 2 کے کنٹریکٹر کو ہدایات دیں۔وزیر اعلیٰ محسن نقوی نے کہا کہ تعمیراتی کاموں میں تیزی لائی جائے اور مقررہ مدت میں کام کو مکمل کیا جائے ۔
انہوں نے کہا کہ پراجیکٹ کی تکمیل سے لاہور کے کسی بھی علاقے سے موٹر وے تک فوری رسائی ممکن ہوگی۔کنٹرولڈ ایکسس کوریڈورکی وجہ سے وقت اور ایندھن کی مد میں کروڑوں روپے کی بچت ہو گی۔ وزیر اعلیٰ نے علی الصبح کیولری انڈرپاس کا دورہ کیا۔ محسن نقوی نے انڈرپاس کی چھت کے فنشنگ ورک کا معائنہ کیا اور سٹیل فکسنگ کے کام کا جائزہ لیا، اسفالٹ کے کام بھی مشاہدہ کیا۔وزیراعلیٰ نے ہدایت کی کہ فنشنگ ورک میں اعلیٰ معیار کو یقینی بنایا جائے ۔انہوں نے کہا کہ کیولری انڈرپاس کو بہت جلد ٹریفک کے لئے کھول دیا جائے گا۔ انڈرپاس کھلنے سے شہریوں کو آمدورفت میں بے پناہ سہولت ملے گی۔ کیولری میں ٹریفک جام رہنے سے مستقل نجات ملے گی۔
محسن نقوی سے وزیراعلیٰ آفس میں آسٹریلیا کے ہائی کمشنر نیل ہاکنز نے ملاقات کی۔ وزیراعلیٰ نے 6ویں مرتبہ ورلڈ کپ جیتنے پر آسٹریلوی ہائی کمشنر اور عوام کو مبارکباد دی۔ آسٹریلوی ہائی کمشنر نے وزیر اعلیٰ محسن نقوی کو آسٹریلوی کپتان پیٹ کمنز اور مارک ٹیلر کے دستخط والی کرکٹ بال پیش کی۔آسٹریلوی ہائی کمشنر نے اس موقع پر گفتگو کرتے ہوئے کہاکہ محسن نقوی مستعد اور متحرک وزیر اعلیٰ ہیں، میڈیا پر دن رات کام کرتے نظر آتے ہیں۔ محسن نقوی کو پارکس کا وزٹ کرتے دیکھ کر خوشی ہوئی،وزیر اعلیٰ محسن نقوی بہت محنت کررہے ہیں۔ لاہور چڑیاگھر، سفاری پارک اور باغات کی اپ گریڈیشن خوش آئند ہے ۔ پنجاب کے ساتھ مختلف شعبوں میں تعاون کو فروغ دینے کیلئے اقدامات جاری رکھیں گے ۔
آسٹریلوی ہائی کمشنر نے لاہور چڑیا گھر کے لئے کنگروز دینے کے لئے اقدامات کی یقین دہانی کرائی۔وزیراعلیٰ محسن نقوی نے اس موقع پر گفتگو کرتے ہوئے کہاکہ سموگ سے نمٹنے کے لئے تمام تر اقدامات کر رہے ہیں، شہریوں کے لئے ماسک لازم قراردیا گیاہے ۔دوست ملکوں کے تعاون سے سموگ سے نمٹنے کے لئے جدید ٹیکنالوجی حاصل کررہے ہیں۔بہتر ماحول اور تفریح کے لئے پارکس کوعالمی معیار کے مطابق بنا رہے ہیں۔ زراعت،لائیوسٹاک،ڈیری ڈویلپمنٹ او رٹیکنالوجی میں آسٹریلیا کے تجربے اور مہارت سے استفادہ کرنا چاہتے ہیں۔ وزیراعلیٰ پنجاب محسن نقوی نے سرگودھا کے ڈاکٹر فیصل مسعود ٹیچنگ ہسپتال میں نواحی علاقے ٹوانہ پارک میں زیادتی کا نشانہ بننے والی بچی کی والدہ اور چچا سے ملاقات کی اورمتاثرہ بچی کی والدہ اور اہل خانہ کی دل جوئی کی اورانہیں انصاف فراہم کرنے کی یقین دہانی کرائی۔ معصوم بچی کی عیادت کی اور خیریت دریافت کی اور شفقت کا اظہار کیا۔
محسن نقوی نے بچی کو علاج معالجے کے لئے بہترین سہولتیں فراہم کرنے کیلئے ڈاکٹرز کو ضروری ہدایات دیں۔ وزیر اعلٰی نے کہا انسانیت سوز واقعہ کا ذمہ دار ملزم انسان نہیں درندہ ہے ۔ ایسادرندہ صفت ملزم عبرتناک سزا کاحقدار ہے ۔ بچی پر ظلم کرنے والا سفاک ملزم قانون کے تحت قرار واقعی سزا سے نہیں بچ پائے گا۔ مظلوم خاندان کی دل جوئی اور داد رسی کے لئے آیا ہوں۔ حکومت متاثرہ خاندان کے ساتھ ہے اور ہر ممکن دیکھ بھال کرے گی۔مظلوم خاندان کی داد رسی میں کوئی کسر اٹھا نہ رکھی جائے گی۔ انصاف کے تمام تقاضے پورے کریں گے ۔وزیراعلیٰ نے میڈیا سے گفتگوکرتے ہوئے کہا کہ بچی کے ساتھ پیش آنے والے افسوسناک سانحہ کی وجہ سے سر شرم سے جھک گئے ۔
