پارلیمنٹ کا مشترکہ اجلاس آج،صدر زرداری خطاب کرینگے
![پارلیمنٹ کا مشترکہ اجلاس آج،صدر زرداری خطاب کرینگے](https://dunya.com.pk/newweb/images/placeholders_gen_image.jpg)
اسلام آباد (سٹاف رپورٹر،اے پی پی ،دنیا نیوز)پارلیمنٹ کے دونوں ایوانوں سینیٹ اور قومی اسمبلی کا مشترکہ اجلاس آج 18 اپریل کو سہ پہر 4 بجے پارلیمنٹ ہاؤس میں ہو گا۔ اجلاس سے صدر مملکت آصف علی زرداری خطاب کریں گے ۔
بتایا گیا ہے مشترکہ اجلاس سے متعلق تمام تر تیاریاں مکمل کرلی گئی ہیں ، سکیورٹی کے خصوصی انتظامات کیے گئے ہیں۔ مشترکہ اجلاس میں چیف جسٹس آف پاکستان، صوبائی گورنرز ، وزرائے اعلیٰ ، چیئرمین جوائنٹ چیفس آف سٹاف کمیٹی اور تینوں سروسز چیفس ، وزیر اعظم آزاد کشمیر، گورنر ،وزیر اعلیٰ گلگت بلتستان ،چاروں صوبائی سپیکرز، سپیکر آزاد جموں کشمیر اور سپیکر گلگت بلتستان قانون ساز اسمبلی ، سفارتکاروں اور زندگی کے دیگر شعبوں سے تعلق رکھنے والی اہم شخصیات کو مدعو کیا گیا ہے ۔ مشترکہ اجلاس کی کوریج کیلئے میڈیا کے نمائندوں کو دعوت نامے جاری کردئیے گئے ۔ پارلیمنٹ ہاؤس میں داخلے کے لئے خصوصی دعوت نامے کا ہونا ضروری ہے ۔ ترجمان کے مطابق بغیر خصوصی دعوت نامے کے پارلیمنٹ ہاؤس کے احاطے میں داخلہ ممکن نہیں ہو گا۔