چینی شہریوں کی سکیورٹی ‘ چلاس میں سیف سٹی پراجیکٹ کا فیصلہ
اسلام آباد ( خصوصی نیوز رپورٹر)چینی و غیر ملکی شہریوں کی فول پروف سکیورٹی یقینی بنانے کے لیے داسو،چلاس میں سیف سٹی پراجیکٹ لگانے کافیصلہ ، وفاقی وزیرداخلہ محسن نقوی نے جامع پلان طلب کرتے ہوئے خصوصی کمیٹی تشکیل دے دی اور اسے 15 روز میں حتمی سفارشات پیش کرنے کا حکم دیا۔
وزیر داخلہ محسن نقوی کی زیر صدارت داسو،چلاس سیف سٹی پراجیکٹ کے قیام کا جائزہ لینے سے متعلق اجلاس ہواجس میں وفاقی سیکر ٹری داخلہ خرم علی آغا، چیئرمین واپڈا لیفٹیننٹ جنرل (ر) سجاد غنی، چیف کمشنر اسلام آباد محمد علی رندھاوااورآئی جی اسلام آباد علی ناصر رضوی نے شرکت کی جب کہ ایڈیشنل چیف سیکر ٹر ی ہوم، ایڈیشنل آئی جی خیبر پختونخوا اور ریجنل پولیس افسر ہزارہ ویڈیو لنک کے ذریعے شریک ہوئے ۔وزیر داخلہ نے کہا کہ داسو، چلاس میں سیف سٹی کا قیام اسلام آباد اور لاہور کی طرح جدید تقاضوں کے مطابق عمل میں لایا جائے گا، سیف سٹی کا مقصد صرف کیمرے لگانا نہیں بلکہ ایسا نظام ہے جو جدید ٹیکنالوجی اور مصنوعی ذہانت کے ٹولز سے لیس ہو۔وزیر داخلہ کا کہنا تھا کہ سیف سٹی پراجیکٹ سے اس علاقے کی نگرانی اور سکیورٹی کو یقینی بنایا جا سکے گا، اسلام آباد پولیس اس سلسلے میں ہر قسم کی معاونت فراہم کرے گی، واپڈا، خیبر پختونخوا پولیس اور اسلام آباد پولیس ملکر اس سلسلے میں جامع پلان تیار کریں۔ واضح رہے کہ 26 مارچ کو بشام کے مقام پر گاڑی پر خودکش حملے کے نتیجے میں 5 چینی باشندوں سمیت 6 افراد ہلاک ہوگئے تھے ۔
