آرمی چیف کا ایرانی ہم منصب کو فون ، ہیلی کاپٹر حادثے پر افسوس
راولپنڈی( خصو صی نیوز رپورٹر ،مانیٹرنگ ڈیسک ،اے پی پی)آرمی چیف جنرل عاصم منیر نے کہا ہے کہ مرحوم ایرانی صدر ابراہیم رئیسی اور ایرانی وزیرخارجہ امیر عبداللہیان غیر معمولی رہنما اور پاکستان کے سچے دوست تھے ۔
آئی ایس پی آر نے جاری بیان میں بتایا کہ آرمی چیف کا ایرانی افواج کے چیف آف جنرل سٹاف میجر جنرل محمد بغیری سے ٹیلی فون پر رابطہ ہوا، جنرل عاصم منیر نے 19 مئی کو ہیلی کاپٹر حادثے میں ایرانی صدر، وزیرخارجہ اور دیگر حکام کے انتقال پر افسوس کا اظہار کیا، آرمی چیف کا کہنا تھا کہ دونوں رہنماؤں سمیت دیگر کے انتقال سے ناقابل تلافی نقصان پہنچا، ایرانی صدر اور وزیرخارجہ پاکستان کے سچے دوست تھے ، پاک فوج کے تمام رینکس مرحومین کے ایصال ثواب کیلئے دعاگو ہیں۔ آرمی چیف نے سوگوار خاندانوں کیلئے نیک خواہشات کا اظہار کیا۔جنرل عاصم منیر نے کہاپاکستان کے ایران کے ساتھ تاریخی، ثقافتی اور برادرانہ تعلقات ہیں، پاکستان اور ایران کی افواج ہرموقع پر ایک ساتھ کھڑی ہیں۔ایرانی چیف آف جنرل سٹاف نے دکھ کی گھڑی میں ساتھ دینے پر آرمی چیف سے اظہار تشکر کیا، ایرانی جنرل نے دونوں افواج کے درمیان تعاون جاری رکھنے کے عزم کا اعادہ کیا۔
