شہباز گل کے بھائی کی بازیابی کا کیس:آئی جی آج طلب،ضرورت پڑی تو وزیراعلیٰ کو بلائینگے:ہائیکورٹ
لاہور (کورٹ رپورٹر) لاہور ہائیکورٹ کے جسٹس امجد رفیق نے شہباز گل کے بھائی کی بازیابی کی درخواست پر ایڈووکیٹ جنرل پنجاب اور آئی جی پنجاب کو آج طلب کرلیا، عدالت نے مغوی کو پیش نہ کرنے پر اظہار برہمی کرتے ہوئے پولیس رپورٹ مسترد کر دی۔
عدالت نے حکم دیا کہ آج مغوی اور تفصیلی رپورٹ پیش کریں، عدالت نے ریمارکس دیئے اگر ضرورت پڑی تو وزیر اعلیٰ کو بھی طلب کیا جائیگا،جبری گمشدگیاں آئین میں دیئے گئے بنیادی حقوق کے خلاف ہیں،پنجاب حکومت اس حوالے سے اپنا پالیسی بیان دے ، یہ کیا طریقہ ہے کہ کیسز سے ضمانت ملے تو اسے اٹھا لو، عدالتی حکم کے باوجود مغوی کو بازیاب کراکے پیش نہ کیا گیا ،وکیل درخواست گزار نے موقف اپنایا کہ عدالت مغوی کی بازیابی کے لیے سینئر پولیس افسروں کی تقرری کا حکم دے ،شہباز گل کے بھائی غلام شبیر کو اسلام آباد جاتے ہوئے پولیس نے حراست میں لیا ، پولیس غلام شبیر کے متعلق کچھ نہیں بتا رہی ، شہباز گل کے بھائی کی جان کو خطرہ ہے ۔
