ایف پی ایس سی کاگریڈ 16 تا 18 اسامیوں پر بھرتی کا اعلان
لاہور(آئی این پی )فیڈرل پبلک سروس کمیشن (ایف پی ایس سی)نے گریڈ 16 سے 18 کی اسامیوں پر بھرتی کا اعلان کر دیا ۔
ایف پی ایس سی کے جاری اشتہار کے مطابق ایئرپورٹس سکیورٹی فورس، کسٹمز، وزارت دفاع، اور اسٹیبلشمنٹ ڈویژن سمیت مختلف محکموں میں ملازمت کے مواقع دستیاب ہیں۔ اے ایس ایف میں انسپکٹر،ایف بی آر میں انسپکٹر کسٹمز اور انٹیلی جنس آفیسر،وزارت دفاع کے تحت ای ایم ای میں سویلین سٹور آفیسر ، فیڈرل گورنمنٹ ایجوکیشنل انسٹیٹیوشنز میں خواتین لائبریرین اور نیول ہیڈ کوارٹرز میں جونیئر سائنٹیفک آفیسر کیلئے درخواستیں طلب کی گئی ہیں۔ نیول ہیڈ کوارٹرز میں اسسٹنٹ منیجر پرسونل اینڈ ایڈمنسٹریشن گریڈ 16 کیلئے بھی اشتہار دیا گیا ہے ۔ اسٹیبلشمنٹ ڈویژن کے تحت سٹاف ویلفیئر آرگنائزیشن میں سٹاف ویلفیئر آفیسر گریڈ 17 اور ڈپٹی ڈائریکٹر گریڈ 18کی آسامیوں پر بھرتی کی جائے گی۔ امیدواروں کو ہدایت دی گئی ہے کہ وہ 16 دسمبر 2024 تک درخواستیں جمع کروا دیں۔ایف پی ایس سی کی ویب سائٹ پر مکمل معلومات اور درخواست دینے کا طریقہ کار دستیاب ہے ۔
