کاروباری برادری کے مسائل کا حل ترجیح :معاشی استحکام پہلا ،زینہ ترقی کا سفراب شروع:شہباز شریف
اسلام آباد(نامہ نگار،وقائع نگار،مانیٹرنگ) وزیر اعظم شہباز شریف نے کہا ہے کہ کاروباری برادری کے مسائل کا حل اولین ترجیح ہے ، حکومت آپکا بھرپور ساتھ دے گی۔
وزیر اعظم سے صدر ایف پی سی سی آئی عاطف اکرام شیخ سمیت مختلف چیمبرز آف کامرس کے صدور نے ملاقات کی ، معاشی استحکام پر حکومتی ٹیم کی تعریف، مشاورتی عمل کا حصہ بنانے پر اظہار تشکر بھی کیا۔وزیر اعظم نے ہدایت کی تمام وزارتیں اور متعلقہ سیکرٹریز چیمبرز آف کامرس سے مشاورت کے بعد انکی تجاویز پر پالیسی اقدامات کا لائحہ عمل پیش کریں۔ انہوں نے کہا معاشی استحکام کا حصول پہلا زینہ ہے ، ملکی ترقی کا سفر اب شروع ہوا ہے .معیشت کی ترقی کیلئے سب کو مل کر کام کرنا ہے ۔
حکومت کاروباری برادری کی سہولت کیلئے ہر ممکن اقدام اٹھا رہی ہے ۔وزیر اعظم نے کہا فیس لیس کلیئرنس سسٹم سے بندرگاہوں پر کنٹینرز کی کلیئرنس کے وقت میں خاطر خواہ کمی آئی ہے ،تاجر برادری حکومت کے ٹیکس ریونیو میں اضافے کیلئے سسٹم میں اصلاحات پر اپنی تجاویز دے ۔ملاقات میں وفاقی وزرا رانا تنویر حسین، احد خان چیمہ، محمد اورنگزیب، عطاء اللہ تارڑ، حنیف عباسی، سردار اویس خان لغاری، شزہ فاطمہ خواجہ، علی پرویز ملک، وزیرِ مملکت بلال اظہر کیانی، معاون خصوصی ہارون اختر، وزیرِ اعظم کے کوارڈی نیٹر رانا احسان افضل اور متعلقہ اعلیٰ حکام نے شرکت کی۔
