عافیہ کیس اب ایک تحریک بن چکی:اسلام آباد ہائیکورٹ
اسلام آباد(اپنے نامہ نگارسے )اسلام آباد ہائیکورٹ کے جسٹس سردار اعجازاسحاق خان نے کہاہے کہ عافیہ صدیقی کیس اب ایک تحریک بن چکی ہے ،پٹیشن کو ختم کرنے سے مسئلہ ختم نہیں ہوگا۔
عدالت نے عافیہ صدیقی کی رہائی اور وطن واپسی سے متعلق کیس میں ڈاکٹر فوزیہ صدیقی کی درخواست میں ترمیم کی استدعا منظورکرلی اوروکیل عمران شفیق کوایک ہفتے میں ترمیم شدہ درخواست دائرکرنے کی ہدایت کردی،جسٹس سرداراعجاز اسحاق نے استفسار کیاکہ حکومت کیوں اس درخواست کو نمٹانا چاہتی ہے اس میں حکومت کا کیا فائدہ ہے ؟، جس پر ایڈیشنل اٹارنی جنرل نے کہا ہم اس کیس میں جس حدتک جو کچھ کر سکتے تھے کر چکے ہیں، جسٹس سردار اعجاز اسحاق خان نے کہا یہ لمبی جہدوجہد والا کام ہے ، عافیہ صدیقی کیس اب ایک تحریک بن چکی ہے ،اس پٹیشن کو ختم کرنے سے مسئلہ ختم ہوگا نہ حل ہوگا،کیس میں جو جو اقدامات حکومت کے تھے وہ اس عدالت نے کیے ہیں،عدالتی حکم کی وجہ سے ڈاکٹر فوزیہ صدیقی کو امریکا کا ویزا ملا،عدالتی حکم کی وجہ سے ڈاکٹر عافیہ صدیقی کی سزا معافی کی پٹیشن میں وزیر اعظم نے خط لکھا،عدالت کی مداخلت کے بعد ہی ڈاکٹر فوزیہ صدیقی کی اپنی بہن عافیہ صدیقی سے ملاقات ممکن ہو سکی،عدالت کے حکم پر پاکستانی وفد امریکا گیا اور عافیہ صدیقی سے ملاقات بھی ہوئی، بعدازاں سماعت دو ہفتوں بعد تک ملتوی کردی گئی۔
