ذوالفقار علی بھٹو جونیئر کا نئی سیاسی جماعت بنانے کا اعلان
لاہور(مانیٹرنگ ڈیسک،نیوزایجنسیاں )سابق وزیراعظم اور پیپلز پارٹی کے بانی ذوالفقار علی بھٹو کے پوتے ذوالفقار علی بھٹو جونیئر نے نئی سیاسی جماعت بنانے کا اعلان کردیا ۔
لاہور پریس کلب میں پریس کانفرنس کرتے ہوئے ذوالفقار علی بھٹو جونیئر نے کہا کہ وہ ایک نئی سیاسی جماعت بنا رہے ہیں جس کا باقاعدہ اعلان جلدکیا جائے گا۔ روٹی،کپڑا اور مکان کا نعرہ آج بھی موجود ہے ، عوام کو آج مزید 3 چیزیں بجلی، گیس اور پانی بھی چاہیے ، ہمارا نعرہ جئے عوام ہوگا۔آصف علی زرداری گروپ نے بھٹو کا نعرہ کرپشن کو فروغ دینے کے لیے لگایا، کارپوریٹ فارمنگ زمینوں پر قبضہ کرنے کا منصوبہ ہے ، پنجاب کے کسان ملکی معیشت میں ریڑھ کی ہڈی کی حیثیت رکھتے ہیں، وہ جماعتیں آج کہاں ہیں جو کسانوں کی بات کرتی ہیں، اگر سندھ کے کسان بھی پنجاب کی طرح آواز اٹھائیں گے تو وہ اسلام آباد کی طرف مل کر چلیں گے ۔
