عوام کو مفت بجلی کے دعوے کہاں گئے ؟ حافظ نعیم الرحمن
لاہور(سٹاف رپورٹر)امیر جماعت اسلامی حافظ نعیم الرحمن نے حکمرانوں کو قومی انتخابات کے دوران گھریلو صارفین کو مفت بجلی اور سستا پٹرول فراہم کرنے کے بلندو بانگ دعوے اور وعدے یاد دلاتے ہوئے سوال کیا ہے کہ۔۔۔
اقتدار میں ڈیڑھ برس گزارنے کے باوجود عوام سے کیے گئے ان وعدوں کا کیا بنا؟ امیر جماعت اسلامی نے سماجی رابطوں کی ویب سائٹ ایکس پر مسلم لیگ ن، پیپلز پارٹی اور دیگر حکومتی پارٹیوں کے رہنماؤں کی انتخابی مہم کے دوران تین سو یونٹ تک مفت بجلی کرنے کی ویڈیو جاری کی ہے۔ نعیم الرحمن نے ایکس پر اظہار خیال کرتے ہوئے کہا کہ ان کے مفت بجلی کے دعوے اور وعدے کہاں گئے ۔ آج مہنگی ترین بجلی نے معیشت کا پہیہ جام اور عوام کا جینا محال کردیا ہے ۔ فائدے میں صرف حکمران اور ان کا شوگرمل مافیا رہا۔ انہوں نے مزید کہا کہ حکمران طبقہ کے علاوہ عوام، کسان اور صنعت کار سب خسارے میں ہیں۔
