عمران خان کے بچوں کی گرفتاری کی بات کم ظرفی ، علی امین
پشاور(مانیٹرنگ ڈیسک)وزیراعلیٰ خیبرپختونخوا علی امین گنڈاپور نے کہا ہے کہ سیاسی انتقام سے دنیا میں پاکستان کی ساکھ کو نقصان پہنچ رہا ہے، ایک بیان میں انہوں نے کہا کہ عمران خان کے بیٹے پاکستان آئیں گے۔۔۔
ان کی گرفتاری کی بات کرنا انتہائی کم ظرفی ہے، اگر مجھے یقین ہو کہ کوئی مجھے گولی مارنے آ رہا ہے تو میں بھی جواب دوں گا، یہ میرا ذاتی موقف ہے ، ہمارے مذہب اور آئین میں مکمل سیلف ڈیفنس کی اجازت موجود ہے ، خاموش رہنا اور جواب نہ دینا خودکشی کے مترادف ہے ۔وزیر اعلیٰ نے کہا کہ پارٹی میں گروپ بندی نہیں ہونی چاہیے ، سب کو متحد ہو کر آگے بڑھنا چاہیے ، میں نے ہمیشہ پارٹی میں اتحاد اور قوم کو یکجا رکھنے کی بات کی ہے ، اگر خیبرپختونخوا حکومت گری تو سیاست چھوڑ دوں گا۔ان کا کہنا تھا کہ سینیٹ سے متعلق تمام فیصلے بانی پی ٹی آئی ہی کریں گے ، پارٹی کی قیادت کو بانی سے ملاقات کی اجازت دی جائے ۔علی امین نے کہا کہ سیاسی جبر کی صورت میں جلد لائحہ عمل پیش کیا جائے گا، احتجاج کے حق پر قدغن افسوسناک ہے ، گرفتاریوں کا سلسلہ ناقابل قبول ہے ۔اپنے دفاع کی بات کرتا ہوں تو اُسے دھمکی کہا جاتا ہے ۔
