ایف سی کو وفاقی فورس میں تبدیل کرنیکا آرڈیننس جاری
اسلام آباد(دنیا نیوز)صدرِ مملکت آصف علی زرداری نے فرنٹیئر کانسٹیبلری ری آرگنائزیشن آرڈیننس 2025 جاری کر دیا جس کے تحت فرنٹیئر کانسٹیبلری کو ملک گیر وفاقی فورس میں تبدیل کر دیا گیا۔
اب یہ فورس فیڈرل کانسٹیبلری کہلائے گی، دائرہ کار چاروں صوبوں، اسلام آباد، آزاد جموں و کشمیر اور گلگت بلتستان تک بڑھا دیا گیا ۔ آرڈیننس کے تحت ایف سی ایکٹ 1915 میں اہم ترامیم کی گئی ہیں۔ نئے قانون کے مطابق وفاقی حکومت فیڈرل کانسٹیبلری کے انسپکٹر جنرل کا تقرر کرے گی، فورس کے ہر ڈویژن میں ایک ونگ کمانڈر تعینات کیا جائے گا جس کا رینک ڈپٹی انسپکٹر جنرل کے برابر ہو گا۔ تنظیم نو کے تحت فورس کو دو بڑے ڈویژنز سکیورٹی ڈویژن اور فیڈرل ریزرو ڈویژن میں تقسیم کیا جائے گا، اس فورس کی بنیادی ذمہ داریوں میں فسادات پر قابو پانا، داخلی سلامتی، انسداد دہشت گردی اور اہم شخصیات یا مقامات کا تحفظ شامل ہوگا۔ آرڈیننس کے مطابق ملک بھر میں فیڈرل کانسٹیبلری کی بھرتیوں کے لیے دفاتر قائم کیے جائیں گے ، کمانڈ کی ذمہ داری پولیس سروس آف پاکستان کے افسران کے سپرد ہو گی، وفاقی حکومت قانون و انصاف کی بہتری اور امن و امان کی بحالی کے لیے وفاقی ریزرو فورس بھی بھرتی کر سکے گی۔ وزیر مملکت داخلہ طلال چودھری نے کہا فیڈرل کانسٹیبلری کو تنخواہ وفاقی حکومت دے گی، چاروں صوبوں سے اہلکار بھرتی کیے جائیں گے ، ایف سی کی تربیت سے متعلق اقدامات کر رہے ہیں، قیام امن کے لیے ایف سی کا خصوصی کردار ہو گا، پورے پاکستان سے لوگ بھرتی کیے جائیں گے ، ایف سی میں عصر حاضر کے تقاضوں کے مطابق نئے ونگز بنائے جائیں گے۔
