ہائیکورٹ:سلمان شہباز کیخلاف چیک باؤنس کا مقدمہ درج کرنے کاحکم معطل
لاہور(کورٹ رپورٹر)چیف جسٹس لاہور ہائیکورٹ نے وزیرِاعظم شہباز شریف کے بیٹے سلمان شہباز کے خلاف چیک باؤنس کا مقدمہ درج کرنے کا سیشن کورٹ کا حکم معطل کر دیا اور آئندہ سماعت پر وکلا سے دلائل طلب کرلیے۔
چیف جسٹس عالیہ نیلم نے سلمان شہباز کی درخواست پر سماعت کی۔ درخواست گزار کی جانب سے جاوید ارشد بھٹی ایڈووکیٹ عدالت میں پیش ہوئے ۔ وکیل نے عدالت کو بتایا کہ سیشن کورٹ نے 10 جولائی کو قانون کے منافی مقدمہ درج کرنے کے احکامات جاری کیے ۔ سیشن کورٹ نے حقائق کا جائزہ لیے بغیر چیک ڈس آنر کے معاملے پر مقدمہ درج کرنے کا حکم دیا۔ ہائیکورٹ مقدمہ درج کرنے کے حکم کو کالعدم قرار دے اور حتمی فیصلے تک یہ حکم معطل رکھا جائے ۔چیف جسٹس نے سیشن کورٹ کا مقدمہ درج کرنے کا حکم معطل کرتے ہوئے فریقین کو نوٹسز جاری کر دئیے اور 31 جولائی تک جواب طلب کر لیا۔
روزنامہ دنیا ایپ انسٹال کریں
