احتساب عدالت کا فیصلہ معطل،پرویزالٰہی کوعدالت میں حاضری سے استثنیٰ
راولپنڈی(دنیا نیوز)لاہور ہائیکورٹ راولپنڈی بینچ نے سابق وزیراعلیٰ پنجاب پرویز الٰہی کے خلاف احتساب عدالت کا فیصلہ معطل کر دیا۔
جسٹس شہرام سرور اور ساجد محمود سیٹھی پر مشتمل بینچ نے پرویز الٰہی کی رٹ پٹیشن پر نیب کو نوٹس جاری کرتے ہوئے احتساب عدالت کا فیصلہ معطل کر دیا اور انہیں عدالت میں حاضری سے استثنٰی دے دیا۔دوران سماعت وکیل نے بتایا کہ پرویز الٰہی بزرگ سیاستدان ہیں اور خرابی صحت کی بنا پر لاہور میں زیرعلاج ہیں، وہ ہر تاریخ پر احتساب عدالت نہیں آسکتے ،جسٹس شہرام سرور نے نیب پراسیکیوٹر کو طلب کر کے پوچھا کہ نیب کو پرویز الٰہی کی ذاتی حاضری سے استثنا پر کیا اعتراض ہے ، جس پر بتایا گیا کہ پرویز الہٰی کی علالت ایسی نہیں ہے کہ انہیں استثنا دیا جائے ۔بعد ازاں عدالت نے ابتدائی سماعت کے بعد پرویز الہٰی کی رٹ پٹیشن باقاعدہ سماعت کیلئے منظور کرتے ہوئے احتساب عدالت کا فیصلہ معطل کر دیا اور نیب کو تفصیلی بحث کیلئے نوٹس جاری کر دیا۔
