افغان سرحد پر خوارج کی دراندازی کی کوشش ،5مبینہ خودکش حملہ آور گرفتار
اسلام آباد (خصوصی نیوز رپورٹر، مانیٹرنگ ڈیسک)پاک افغان سرحد پر خوارج کی دراندازی کی کوشش ناکام بناتے ہوئے سکیورٹی فورسز کے اہلکاروں نے 5 مبینہ خودکش حملہ آوروں کو گرفتار کر لیا۔
سکیورٹی ذرائع کے مطابق 17 جولائی کی شام 5 بجے خوارج نے پاک افغان سرحد سے دراندازی کی کوشش کی، سکیورٹی فورسز نے اطلاع ملتے ہی پانچ مختلف مقامات پر ناکہ بندی کی، شام 6 بج کر 25 منٹ پر خوارج سرحد سے پاکستانی حدود میں داخل ہوئے ۔سکیورٹی ذرائع کا کہنا ہے کہ دراندازی کے بعد خوارج نے عزیز خیل اور منڈی خیل کی سمت پیش قدمی کی، سکیورٹی فورسز کی موجودگی کے باعث خوارج نے بیسی خیل کی مسجد میں پناہ لے لی، سکیورٹی فورسز نے فوری طور پر مسجد کا محاصرہ کرلیا۔ذرائع کے مطابق سکیورٹی فورسز کی بہترین حکمتِ عملی کے باعث خوارج نے ہتھیار ڈال دئیے ۔ گرفتار خوارج افغان شہری ہیں، تین کے پاس افغان شناختی کارڈ بھی موجود ہیں، گرفتار افراد کی عمریں 15 سے 18 سال کے درمیان ہیں، تمام خوارج کو مزید تفتیش کے لیے نامعلوم مقام پرمنتقل کر دیا گیا ہے ۔سکیورٹی ذرائع کے مطابق پاک افغان سرحد سے دراندازی سے لے کر پاکستان میں دہشت گردی پھیلانے تک فتنۃ الخوارج کو بھارت کی مکمل حمایت حاصل ہے ۔
