نو برڈ زون:حساس مقامات 30 جولائی تک کلیئر کرنیکی مہلت
لاہور (اے پی پی)وزیراعلیٰ پنجاب مریم نواز نے فضائی سفر کو محفوظ بنانے کیلئے انتظامی اداروں کو ایئرپورٹس کے قریب واقع حساس مقامات 30 جولائی تک کلیئر کرنے کی ڈیڈ لائن دے دی۔
ترجمان ایوان وزیر اعلیٰ کے مطابق مریم نواز کی ہدایت پر''نو برڈ زون''کے تحت ایئرپورٹس کے گرد 8 کلومیٹر کا علاقہ محفوظ بنانے کا گرینڈ آپریشن تیز کر دیا گیا ہے ،وائلڈ لائف و ای پی اے فورسز اورضلعی انتظامیہ نے نو برڈ زون میں کارروائیاں شروع کر دیں،پرندوں کی موجودگی روکنے کیلئے لاہور کنٹونمنٹ، والٹن کنٹونمنٹ اور ایل ڈبلیو ایم سی کے علاقوں میں کچرا ہٹانے کا عمل تیز کر دیا گیا۔ اس سلسلے میں وائلڈ لائف اور ای پی اے فورس نے ضلعی انتظامیہ کے ہمراہ مختلف علاقوں میں مشترکہ آپریشن کے دوران درجنوں شہریوں کو گرفتار کر کے جرمانے اور کبوتروں سمیت پرندوں کے ڈبے بھی قبضے میں لئے ہیں ۔ پرندوں سے ہوائی حادثات کے خدشے کے پیش نظر حساس زونز میں کچرا پھینکنے پر مکمل پابندی عائد ہے ۔الفیصل ٹاؤن میں کبوتروں کے ڈیرے ختم کرنے ، پولٹری شاپس کی نگرانی اور گیریژن کلب میں ڈی نیسٹنگ آپریشنز مکمل کر لئے گئے ،ذبحہ خانوں، پولٹری فارمز، درباروں اور چھتوں پر دانہ ڈالنے پر مکمل پابندی عائد کر دی گئی ۔ وزیر اعلیٰ مریم نواز کی جانب سے نو برڈ زون میں زیرو ٹالرنس پالیسی لاگو کر دی گئی،گیریژن گالف کلب میں 142 گھونسلے ، باغِ رحمت سکول ایریا سے 21 گھونسلے ، بھٹہ چوک سے 18، شالامار باغ سے 42 اور جیل روڈ سے 15 گھونسلے ہٹا دئیے گئے ۔
