چینی پر ٹیکس چھوٹ، پی اے سی کا نوٹس،چیئرمین ایف بی آر طلب
اسلام آباد(مانیٹرنگ ڈیسک،نیوز ایجنسیاں) قومی اسمبلی کی پبلک اکاؤنٹس کمیٹی (پی اے سی) نے حکومتی فیصلے کی روشنی میں چینی کی درآمد پر ٹیکس چھوٹ کی منظوری کا نوٹس لے لیا اور وضاحت کے لیے چیئرمین فیڈرل بورڈ آف ریونیو (ایف بی آر) کو اگلے اجلاس میں طلب کر لیا۔
جنید اکبر کی زیر صدارت قومی اسمبلی کی پبلک اکاؤنٹس کمیٹی کا اجلاس ہوا جس میں چینی کی درآمد اور برآمد کا معاملہ زیر بحث آیا۔چیئرمین پی اے سی نے کہا کہ پہلے چینی برآمد کرکے کماتے ہیں، ایکسپورٹ سے چینی بھی مہنگی ہو جاتی ہے ، بعد ازاں قلت کا رونا روکر اور نرخوں کو مستحکم کرنے کے نام پر چینی پھر درآمد کی جاتی ہے ، یہ کھیل کئی دہائیوں سے جاری ہے ۔پی اے سی کے رکن معین عامر نے کہا بار بار ایسا ہورہا ہے ، چینی کے معاملے پر ہمیں ایکشن لینا چاہیے ۔کمیٹی رکن ثنااللہ مستی خیل نے کہا کہ یہ عمل عوام کی جیبوں پر ڈاکا ہے ، یہ چند لوگوں کو نوازنے کا ایک طریقہ ہے ، یہاں صرف مافیا کو نوازا جارہا ہے اور غریب عوام کو رلایا جا رہا ہے ۔چیئرمین کمیٹی نے کہا کہ چینی کی درآمد پر ٹیکس چھوٹ کی منظوری پر اگلے اجلاس میں چیئرمین ایف بی آر راشد محمود لنگڑیال کو بلائیں گے ۔
