قائد عوام یونیورسٹی :فنڈز میں خورد برد، ڈائریکٹر فنانس سمیت 5گرفتار
نواب شاہ (نمائندہ دنیا )نواب شاہ کی قائد عوام یونیورسٹی میں ہائر ایجوکیشن کمیشن کی جانب سے جاری 70 کروڑ روپے کے فنڈز میں مبینہ خورد برد کا بڑا اسکینڈل سامنے آ گیا۔ ایف آئی اے نے چھاپہ مار کر ڈائریکٹر فنانس سمیت متعدد افراد کو گرفتار کر لیا، جبکہ کئی اہم نام مفرور ہو گئے ۔
اطلاعات کے مطابق ایف آئی اے نے قائد عوام یونیورسٹی آف انجینئرنگ اینڈ ٹیکنالوجی نواب شاہ میں 70 کروڑ روپے کے سرکاری فنڈز میں خورد برد کے کیس میں بڑی کارروائی کرتے ہوئے یونیورسٹی کے ڈائریکٹر فنانس قمر دین شیخ سمیت 5 افراد کو گرفتار کر لیا جبکہ 7 ملزمان فرار ہونے میں کامیاب ہو گئے جن میں 4 پروفیسرز بھی شامل ہیں۔ایف آئی اے شہید بے نظیر آباد سرکل کے اہلکاروں نے یونیورسٹی پر چھاپہ مارا اور قمر دین شیخ کو حراست میں لے لیا۔ مفرور پروفیسرز میں عدنان، پردیب کمار ہیرانی، عبدالناصر لغاری اور ندیم سومرو شامل ہیں، جبکہ اظہر علی اور سید منصور علی شاہ کو بھی ایف آئی آر میں نامزد کیا گیا ہے ۔ایف آئی اے سرکل نواب شاہ کے ڈپٹی ڈائریکٹر افروز کلواڑ نے میڈیا کو بتایا کہ ہائر ایجوکیشن کمیشن کی جانب سے جاری فنڈز میں سنگین مالی بے ضابطگیوں کی شکایات پر کارروائی کی گئی۔ انہوں نے کہا کہ تفتیش جاری ہے اور جلد دیگر مفرور ملزمان کو بھی گرفتار کر لیا جائے گا۔ ایف آئی اے نے مقدمہ درج کر کے قانونی کارروائی کا آغاز کر دیا ہے ۔
