پنجاب میں اکثریت دلوائیں،بہاولپور صوبہ بناکردینگے ، گورنر سلیم
لاہور(سپیشل رپورٹر)گورنر سردار سلیم حیدر خان کا دورہ بہاولپور، بہاولپور بار آمد پر وکلاء برادری نے شاندار استقبال کیا۔ گورنر سلیم حیدر نے اس موقع پر کہا کہ پیپلزپارٹی نے ہمیشہ وکلاء برادری کی قدر کی اور انہیں عزت دی۔
پیپلزپارٹی جب اقتدار میں آتی ہے تو وکلاء کے مسائل حل کرتی ہے ۔جنوبی پنجاب کے لوگ محرومیوں کا شکار ہیں اور آپ کی محرومیوں کا ازالہ اس کے علاوہ نہیں ہو سکتا کہ آپ کا صوبہ علیحدہ بنایا جائے ۔گورنرپنجاب نے کہا میں آپ سے وعدہ کرتا ہوں کہ اگر جنوبی پنجاب کے عوام پیپلزپارٹی کو پنجاب اسمبلی میں اکثریت دلوائیں، آپ کے الگ صوبے کیلئے پیپلزپارٹی کھڑی نہ ہواور آپ کا صوبہ نہ بنائے تو میں پارٹی اور سیاست چھوڑ دوں گا۔ گارنٹی دیتا ہوں پیپلزپارٹی بہاولپور صوبے کیلئے ووٹ دے گی۔پنجاب بہت بڑا صوبہ ہے ۔پنجاب کے وسائل صرف لاہور میں استعمال ہو رہے ہیں۔سردار سلیم حیدر نے کہا میں پنجاب کے دوسرے کونے اٹک سے ہوں۔ دعوے سے کہتا ہوں اٹک میں جا کر دیکھ لیں نہ ہسپتالوں میں ڈاکٹر ہیں نہ کسی سکول میں ٹیچر، نہ کوئی سڑک ہے نہ کوئی ترقیاتی منصوبے ہیں۔بہاولپور کی طرح اٹک بھی محرومیوں کا شکار ہے۔
