فضل الرحمن پی ٹی آئی سے چن چن کر بدلہ لے رہے :کنڈی
خیبر پختونخوا حکومت چاہے تو گورنر راج لگ سکتا ، وہ چاہے تو ایسا نہیں ہوسکتا امن و امان کے لیے وفاق اور سکیورٹی فورسز کے ساتھ تعاون کرنا ہو گا:انٹرویو
اسلام آباد( آن لائن )گورنر خیبر پختونخوا فیصل کریم کنڈی نے کہا ہے کہ سربراہ جمعیت علمائے اسلام (ف)مولانا فضل الرحمن بڑے زیرک سیاستدان ہیں۔ وہ تحریک انصاف سے چن چن کر بدلہ لے رہے ہیں،گورنر راج کا سارا دارومدار خیبر پختونخوا حکومت پر ہے ۔ خیبر پختونخوا حکومت چاہے تو گورنر راج لگ سکتا ہے ، وہ چاہے تو ایسا نہیں ہوسکتا۔ ٹی وی سے گفتگو کرتے ہوئے فیصل کریم کنڈی نے کہا کہ سکیورٹی فورسز کے جوان اپنے شہیدوں کے جنازے اٹھاتے ہیں۔ اور اگر ہم کہیں فوج کی ضرورت نہیں تو شہدا کے لواحقین پر کیا گزرے گی؟۔ ہم سب کہتے ہیں کہ صوبے میں دہشتگردی ہے اور شام کو باہر نہیں نکل سکتے ۔ دہشتگردی سے لڑنے کے لیے اگر سکیورٹی فورسز نہیں ہوں گی تو مقابلہ کیسے ہو گا؟۔ اگر طالبان اسلامی نظام کی بات کرتے ہیں تو کونسے اسلام میں لکھا کہ مدرسوں اور سکولوں پر حملہ کریں؟ اور ایسا کون سے اسلام نے کہا ہے کہ آپ معصوم اور بے گناہ بچوں کی جانوں کے ساتھ کھیلیں۔ ایف سی ہیڈ کوارٹرز پر حملہ کر کے فورسز کے جوانوں کو نشانہ بنایا گیا۔ وانا کیڈٹ کالج کے دفاع میں فوج نہ ہوتی تو اے پی ایس ٹو ہوتا۔گورنر خیبر پختونخوا نے کہا کہ سپیکر خیبر پختونخوا نے ایک جرگہ بلایا اور میں نے جرگے میں بھی کہا کہ وفاق کے ساتھ تعلقات ٹھیک کریں۔ امن و امان کے قیام کے لیے وفاق اور سکیورٹی فورسز کے ساتھ تعاون کرنا ہو گا۔ جبکہ ہم وفاق کی طرف سے بلائے گئے اجلاسوں میں نہیں جائیں گے تو اپنا مقدمہ خود ہاریں گے ۔
