ٹریکٹر سکیم کا جنوری میں تیسرا مرحلہ : نعروں کے بجائے عملی طور پر کسانوں کا سہارا بن رہے:مریم نواز
30ہزار ٹریکٹرز کیساتھ سب سے بڑی سکیم کا ریکارڈ قائم، ہرٹریکٹر پر10لاکھ سبسڈی دینگے کاشتکاروں کی معاشی خودمختاری اور زیادہ پیداوارہدف ،جدیدمشینوں سے پنجاب کاشتکاری میں خودکفیل ہوگا
لاہور(دنیانیوز)وزیراعلیٰ مریم نواز شریف نے کہاہے کہ کھوکھلے نعروں کی بجائے عملی طور پر کسانوں کا سہارا بن رہے ہیں،پنجاب کے کاشتکاروں کو ٹریکٹر کی فراہمی کا مقصد معاشی خودمختاری اور زیادہ پیداوار کا ہدف ہے ۔تفصیلات کے مطابق وزیراعلیٰ نے 30ہزار ٹریکٹرز کے ساتھ تاریخ کی سب سے بڑی ٹریکٹر سکیم کا ریکارڈ قائم کر دیا، چیف منسٹر ٹریکٹر پروگرام کے تحت پہلے فیز میں 50سے 75ہارس پاور کے 10ہزار ٹریکٹر ز کاشتکاروں کو مل گئے ۔ دوسرے فیز میں 75سے 85ہارس پاور کے 10ہزار ٹریکٹر کی قرعہ اندازی کی اور فراہمی کا عمل جاری ہے ،ٹریکٹر پر 10لاکھ روپے سبسڈی حکومت ادا کرے گی ،اس ضمن میں 10ارب روپے سبسڈی دی جائے گی ۔
وزیر اعلیٰ پنجاب ٹریکٹر سکیم کا تیسرا فیز جنوری میں شروع ہوگا،کاشتکاروں کو50سے 55ہارس پاور ٹریکٹرز کی فراہمی کیلئے جلد درخواستیں طلب کی جائیں گی، ہائی ٹیک فارم میکانائزیشن فنانسنگ پروگرام کے تحت 100سے 120 ہارس پاور کے بڑے ٹریکٹر بلاسود لون پر دئیے جائیں گے ۔واضح رہے پاکستان مسلم لیگ ن کے قائد نواز شریف کے ویژن اور وزیراعلیٰ مریم نواز کی کاوشوں سے پاکستان کی سب سے بڑی ٹریکٹر سکیم شروع کی گئی اور وزیراعلیٰ کے کسان دوست اقدامات سے پنجاب کے کاشتکاراپنے ٹریکٹرکے مالک بن گئے ۔ مریم نواز کا کہناتھاکہ کاشتکار بھائی اپنے ٹریکٹر کے مالک بن رہے ہیں، اس سے بڑھ کر خوشی کیا ہوگی، حکومت پنجاب کسانوں کا فصل کی بوائی سے فروخت تک پورا ساتھ دے رہی ہے ،کسانوں کو جدید زرعی مشینیں فراہم کرنے سے پنجاب کاشتکاری میں خودکفیل ہوگا۔
