2025 :عسکری میدان میں پاکستان کی تاریخی کامیابیوں کا سال
جراتمندانہ قیادت پر جنرل عاصم منیر فیلڈ مارشل ، چیف آف ڈیفنس فورسز بنے
اسلام آباد (سید ظفر ہاشمی) 2025عسکری میدان میں پاکستان کے لیے تاریخی اور شاندار کامیابیوں کا سال ثابت ہوا۔ اس دوران پاکستان نے دو ممالک کو سبق سکھاتے ہوئے نہ صرف انہیں ان کی اوقات یاد دلا ئی بلکہ دنیا کے سامنے اپنی فوجی صلاحیت کا لوہا بھی منوایا، جس سے خطے کا مجموعی منظرنامہ تبدیل ہو کر رہ گیا۔یہ کامیابیاں بھارت اور افغانستان کے ساتھ ہونے والے عسکری معرکوں کے نتیجے میں حاصل ہوئیں، جن کے ذریعے دونوں ممالک پر واضح کر دیا گیا کہ انہیں اپنی پالیسیوں اور سوچ کو موجودہ حالات کے تقاضوں کے مطابق درست کرنا ہوگا۔ ان واقعات کے بعد دنیا نے یہ منظر دیکھا کہ کس طرح دونوں ممالک اپنی جارحانہ سوچ اور رویے ترک کرنے پر مجبور ہوئے ۔اس دوران عالمی سطح پر پاکستان کا گراف نمایاں طور پر بلند ہوا اور دنیا نے پاکستان کو ایک مستند اور مؤثر عسکری طاقت کے طور پر تسلیم کرتے ہوئے اس کے ساتھ نئے زاویوں سے تعلقات استوار کرنا شروع کر دیے ۔
آج پاکستان دنیا کے لیے ایک مضبوط عسکری صلاحیت رکھنے والا ملک بن کر ابھرا ہے ، جبکہ اس کے مقابل بھارت اور افغانستان اس حوالے سے عالمی سطح پر بے نقاب ہو چکے ہیں۔پاکستان کا دونوں ممالک کے ساتھ فوجی مقابلہ مئی اور اکتوبر 2025 میں ہوا، جہاں پاک فوج کی جرات، بہادری اور مؤثر حکمتِ عملی نے اسے دونوں محاذوں پر واضح برتری دلائی۔ ایک جانب بھارت کا غرور خاک میں ملا تو دوسری جانب افغانستان کو بھی یہ ادراک ہوا کہ پاکستان کے ساتھ معاملات یکطرفہ دباؤ سے نہیں چلائے جا سکتے ۔ان معرکوں میں کامیابی کی بنیاد جدید ٹیکنالوجی میں پاکستان کی دسترس رہی، جبکہ پاک فضائیہ نے فیصلہ کن اور مرکزی کردار ادا کیا۔ جنگ کے دوران پاک فوج کی قیادت مکمل طور پر ایک پیج پر نظر آئی اور حکمتِ عملی کے میدان میں مدمقابل افواج سے کہیں آگے دکھائی دی۔ ان تاریخی کامیابیوں پر جرات مندانہ قیادت کے اعتراف میں آرمی چیف جنرل عاصم منیر فیلڈ مارشل اور چیف آف ڈیفنس فورسز بنے ۔
