ٹرمپ عالمی غنڈے کے روپ میں سامنے آرہا :حافظ نعیم
وینزویلا کے صدر کے اغوا کے بعد دنیا میں پھر نو آبادیاتی نظام مسلط کیا جارہا ہے امریکی من مانی زور پکڑتی جارہی،انسانیت دوست قوتوں کو اٹھ کھڑا ہونا پڑیگا:بیان
لاہور(سٹاف رپورٹر،آئی این پی )امیر جماعت اسلامی پاکستان حافظ نعیم الرحمن نے کہا ہے کہ وینزویلا کے صدر کے اغوا اور ان پر غیر قانونی مقدمے کے بعد دنیا میں ایک بار پھر نو آبادیاتی نظام عملی طور پر مسلط کیا جارہا ، ڈونلڈ ٹرمپ دنیا کی بڑی اقوام کو نام لے کر دھمکیاں دے رہا ہے اور ایک بین الاقوامی غنڈے کے روپ میں سامنے آرہا ہے ۔ سماجی رابطوں کی ویب سائٹ ایکس پر جاری بیان میں امیر جماعت اسلامی پاکستان نے اس امر پر افسوس کا اظہار کیا کہ عالمی طاقتیں بین الاقوامی امن کیلئے اپنا کلیدی کردار ادا کرنے سے قاصر نظر آرہی ہیں اور امریکی من مانی ایک بار پھر زور پکڑتی جارہی ہے ،ایک طرف 80 ہزار انسانوں کا قاتل اور غزہ کو تہس نہس کرنے والا نیتن یاہو امریکی صدر ٹرمپ کی آنکھ کا تارا بنا ہوا ہے اور دوسری طرف ٹرمپ اپنے مخالفین پر یلغار کررہا ہے ۔حافظ نعیم الرحمن نے کہا یہ بھی ایک مسلمہ حقیقت ہے کہ بدمعاشی کا یہ عالمی نظام زیادہ دیر نہیں چل سکتا ،خود امریکی عوام میں ان ظالمانہ اقدامات پر شدید بے چینی پائی جاتی ہے ، دنیا بھر کی انسانیت دوست اور قانون پسند قوتوں کو اٹھ کھڑا ہونا پڑے گا۔
