ٹی ٹونٹی پریکٹس میچ میں قومی ویمنز کو 28رنز سے شکست
کرائسٹ چرچ (اسپورٹس ڈیسک)نیوزی لینڈ الیون ویمنز نے پاکستان ویمنز کرکٹ ٹیم کو ٹی ٹونٹی پریکٹس میچ میں28 رنز سے شکست دیدی۔یہ اس دورے میں پاکستان ویمنز ٹیم کا دوسرا پریکٹس میچ تھا ۔
برٹ سٹکلف اوول لنکن میں کھیلے گئے ٹی ٹونٹی میچ میں پاکستان ویمنز نے ٹاس جیت کر میزبان ٹیم کو بیٹنگ دی جس نے 20 اوورز میں 7 وکٹوں کے نقصان پر 168رنز سکور کیے ۔جی ای پلیمر نے 35 گیندوں پر52 رنز بنائے جس میں چار چوکے اور ایک چھکا شامل تھا۔او این گین نے 28 رنز کی اننگز کھیلی۔ندا ڈار ،نشرہ سندھو اور وحیدہ اختر نے دو دو وکٹیں حاصل کیں۔جواب میں پاکستان ویمنز ٹیم 20 اوورز میں 8 وکٹوں کے نقصان پر140 رنز بنا پائی۔منیبہ صدیقی نے چار چوکوں کی مدد سے 32رنز بنائے ۔نجیہہ علوی 19 رنز بناکر ناٹ آؤٹ رہیں۔ این ایچ پٹیل اور کے اے نائٹ نیدو دو وکٹیں حاصل کیں۔اس موقع پر دونوں ٹیموں نے سپر اوور بھی کھیلا پہلے سپر اوور میں دونوں ٹیموں نے دس دس رنز سکور کیے جس کے بعد دوسرا سپر اوور کھیلا گیا نیوزی لینڈ الیون ویمنز نے پہلے بیٹنگ کرتے ہوئے 9 رنز بنائے ۔ پاکستان ویمنز ٹیم بھی 9 رنز بنا پائی اور یہ سپر اوور بھی برابر ہوگیا۔ سیریز کا آغاز تین دسمبر سے ہوگا۔
