حارث انضباطی کارروائی،سینٹرل کنٹریکٹ تنزلی سے بچ گئے
لاہور(اسپورٹس ڈیسک)پاکستان کرکٹ بورڈ نے شو کاز نوٹس کا جواب ملنے کے بعد فاسٹ بالر حارث رؤف کے خلاف انضباطی کارروائی نہ کرنے کا فیصلہ کیا ہے ۔
سینٹرل کنٹریکٹ میں بھی تنزلی نہیں کی جائے گی البتہ سلیکٹرز اور پی سی بی انتظامیہ نے واضح کردیا ہے کہ مستقبل میں انہیں ڈومیسٹک فرسٹ کلاس میں لازمی شرکت کرنا ہوگی۔ سینٹرل کنٹریکٹ کے باوجود ریڈ بال کھیلنے سے منع کر نے پر ان کے معاہدے کی منسوخی کی کلاز بھی موجود تھی، پی سی بی کوشش کررہا ہے کہ حارث کو کسی ڈیپارٹمنٹل ٹیم سے کھیلنے کی اجازت دلادی جائے ۔انہوں نے پی سی بی کو یقین دلایا کہ وہ ڈیپارٹمنٹس کے فرسٹ کلاس ٹورنامنٹ میں شرکت کریں گے ،حارث رؤف کو پاکستان کرکٹ بورڈ نے بگ بیش کے دوران 21 دن میں پانچ میچوں کے لیے این او سی جاری کیا تھا۔ پی سی بی نے انہیں مستقبل میں ریڈ بال کھیلنے کی ہدایت کررکھی ہے ، وہ بگ بیش کیلئے آسٹریلیا پہنچے ہیں تاہم آرام کی غرض سے پہلا میچ نہیں کھیلیں گے ۔ذرائع نے بتایا کہ وہاب ریاض اور محمد حفیظ نے انہیں اس لئے اجازت دی ہے کہ وہ کرکٹ کھیلتے رہیں اور نیوزی لینڈ کی ٹی ٹونٹی سیریز سے قبل میچ پریکٹس میں رہیں ۔
