انڈر 19 ایشیا کپ : اذان کی سنچری ، پاکستان نے بھارت کو 8 وکٹوں سے ہرا دیا
دبئی (اسپورٹس ڈیسک)انڈر 19 ایشیاکپ کے گروپ میچ میں پاکستان نے دئیے گئے ہدف 260 کو تین اوورز پہلے ہی پورا کرکے بھارت کو 8 وکٹوں سے شکست دیدی۔
دبئی کرکٹ اسٹیڈیم میں کھیلے جانے والے میچ میں پاکستانی بیٹر اذان اویس نے 105 رنز کی ناقابل شکست اننگ کھیل کر جیت میں اہم کردار ادا کیا جب کہ اوپنر شاہ زیب خان کے 63 اور سعد بیگ کے 68 رنز نے ہدف کو اور آسان بنادیا۔سعد بیگ بھی ناقابل شکست رہے ۔ پاکستانی بلے بازوں کے سامنے بھارتی با لر کی ایک نہ چلی۔ صرف مروگن ابھیشیک 2 وکٹیں لینے میں کامیاب ہوسکے لیکن انھوں نے بھی 6 رنز کی اوسط سے 55 رنز کھائے ۔اس سے قبل بھارت نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 259 رنز بنائے تھے ۔ اوپنرز ٹیم کو اچھا آغاز دینے میں ناکام رہے ، ارشین کلکرنی 24 کے انفرادی سکور پر پویلین لوٹے جبکہ رودر پٹیل ایک رنز کے مہمان ثابت ہوئے ۔تیسری وکٹ کی شراکت میں آدرش سنگھ اور بھارتی کپتان ادے سہارن 94 رنز کی پارٹنرشپ قائم کی تاہم آدرش 62 رنز بناکر آؤٹ ہوئے جبکہ کپتان 60 رنز بناکر نمایاں رہے ۔ دیگر کھلاڑیوں میں مشیر خان 2، ارویلی اویناش 11، مروگن ابھیشیک 4 اور راج لمبانی 7 رنز بناسکے ۔میچ کے اختتامی اوورز میں سچن داس نے 3 چھکے اور 2 چوکوں کی مدد سے 58 رنز کی جارحانہ اننگز کھیلی۔پاکستان کی جانب سے محمد ذیشان نے 4، عبید شاہ اور عامر حسن 2،2 جبکہ عرفات منہاس نے ایک وکٹ حاصل کی۔قبل ازیں قومی ٹیم کے کپتان سعد بیگ نے ٹاس جیت کر پہلے فیلڈنگ کرنے کا فیصلہ کیا ۔دوسری جانب گروپ بی کی دونوں ٹیمیں ایک ایک میچ میں کامیابی حاصل کرچکی ہیں۔
