آسٹریلیا نے سکاٹ لینڈ کو مات دے کر انگلینڈ کو سپر 8 میں پہنچا دیا
سینٹ لوشیا(اسپورٹس رپورٹر)ٹی20 ورلڈکپ کے 35 ویں میچ میں آسٹریلیا نے اسکاٹ لینڈ کو 5 وکٹوں سے شکست دے کر ایونٹ سے باہر کردیا جبکہ اسکاٹ لینڈ کی شکست کے ساتھ ہی انگلینڈ سپر ایٹ مرحلے میں پہنچ گیا۔
سینٹ لوشیا میں کھیلے جانے والے گروپ بی کے میچ میں اسکاٹ لینڈ نے مقررہ 20 اوورز میں 5 وکٹوں کے نقصان پر 180 رنز بنائے ، آسٹریلیا نے ٹریوس ہیڈ اور مارکس سٹوئنس کی جارحانہ اننگز کی بدولت نے 19.4 اوورز میں مطلوبہ ہدف حاصل کیا۔ آسٹریلیا نے ٹاس جیت کر اسکاٹ لینڈ کو بیٹنگ کی دعوت دی تھی ، اوپننگ بیٹر مائیکل جونز صرف 2 رنز کے مہمان ثابت ہوئے ، برینڈن میک مولن نے دوسرے اوپنر جوج مونسے کے ساتھ ملکر 89 رنز کی اہم شراکت قائم کی۔جورج مونسے 35 رنز بناکر آؤٹ ہوئے ، میک مولن 34 گیندوں پر 60 رنز کی جارحانہ اننگز کھیل کر آؤٹ ہوئے ، کپتان برینگٹن 31 گیندوں پر 42 رنز بناکر ناقابل شکست رہے ۔گلین میکس ویل نے 2وکٹیں لیں ۔آسٹریلیا کے اوپننگ بلے باز ڈیوڈ وارنر صرف ایک رنز بنانے کے بعد پویلین واپس لوٹ گئے ، ٹریوس ہیڈ نے 68 رنز کی ذمہ دارنہ اننگز کھیلی، کپتان مچل مارش 8 اور گلین میکس ویل 11 رنز بناکر آؤٹ ہوگئے ۔مارکس سٹوئنس کی اننگز نے آسٹریلیا کی جیت میں اہم کردار ادا کیا، انہوں نے 29 گیندوں پر 59 رنز کی جارحانہ اننگز کھیلی، جب کہ ٹم ڈیوڈ 14 گیندوں پر 24 رنز بناکر ناٹ آؤٹ رہے ۔آسٹریلیا نے اسکاٹ لینڈ کا 181رنز کا ہدف 19.4اوورز میں 5 وکٹوں کے نقصان پر حاصل کر لیا۔ سفیان شریف اور مارک واٹ نے 2،2 کھلاڑیوں کو آؤٹ کیا۔ ٹی20 ورلڈکپ کے اگلے مرحلے یعنی سپر ایٹ میں گروپ اے سے بھارت اور امریکا ،گروپ بی سے آسٹریلیا اور انگلینڈ ، گروپ سی سے افغانستان اور ویسٹ انڈیز، گروپ ڈی سے جنوبی افریقہ سپر ایٹ میں پہنچ چکی ہے تاہم بنگلہ دیش اور نیدرلینڈ کے درمیان ابھی فیصلہ ہونا باقی ہے ۔اگر آج بنگلہ دیش نیپال کو شکست دینے میں کامیاب ہوگیا تو وہ سپر ایٹ میں رسائی حاصل کرلے گا تاہم نیپال کے ہاتھوں شکست کے بعد بھی بنگلہ دیش اگلے مرحلے میں رسائی حاصل کرسکتا ہے لیکن اس کیلئے سری لنکا کو اپنے آخری میچ میں نیدرلینڈ کو شکست دینا ہوگی۔
