پی ایس بی نے فیڈریشنز سے مالی تفصیلات طلب کرلیں
![پی ایس بی نے فیڈریشنز سے مالی تفصیلات طلب کرلیں](https://dunya.com.pk/news/2024/September/09-04-24/news_big_images/2401977_14333002.jpg)
اسلام آباد (سپورٹس رپورٹر)پاکستان سپورٹس بورڈ نے سپورٹس فیڈریشنز کے لیے مالی شفافیت اور جوابدہی کو یقینی بنانے کے لیے سخت اقدامات کا اعلان کیا ہے ۔
پی ایس بی نے تمام فیڈریشنز کو حکم دیا ہے کہ وہ اپنے سالانہ آڈٹ شدہ حسابات اور بینک سٹیٹمنٹس 15 ستمبر 2024 تک جمع کرائیں۔پی ایس بی کی جانب سے جاری کردہ خط کے مطابق تمام فیڈریشنز کو 30 جون 2024 کو ختم ہونے والے مالی سال کے مکمل آڈٹ شدہ مالیاتی گوشوارے جمع کرانے ہوں گے ۔ ان گوشواروں کی تصدیق ایک تسلیم شدہ چارٹرڈ اکاؤنٹنٹ فرم سے کرانا لازمی ہوگی۔ اس کے علاوہ 1 جنوری 2024سے 30جون 2024 تک کی مدت کے لیے تمام بینک سٹیٹمنٹس کی بینک سے تصدیق شدہ نقول بھی جمع کرانا ہوں گی۔یہ اقدامات اس بات کو یقینی بنانے کے لیے کیے جا رہے ہیں کہ فیڈریشنز کو فراہم کردہ فنڈز کھلاڑیوں کی ترقی اور معاونت کے لیے استعمال ہوں۔ انہوں نے کہا کہ ان دستاویزات کی عدم فراہمی کی صورت میں فیڈریشنز کی مستقبل کی مالی معاونت روکی جا سکتی ہے ۔ پاکستان سپورٹس بورڈ نے اس بات پر زور دیا کہ ان اقدامات کا مقصد صرف قواعد و ضوابط کی پاسداری ہی نہیں بلکہ اس بات کو بھی یقینی بنانا ہے کہ پیسے کا درست استعمال ہو اور اس کا فائدہ ان کھلاڑیوں کو پہنچے جو ملک کی نمائندگی کرتے ہیں۔