پاکستان شاہینز، سری لنکا اے پہلا چار روزہ میچ آج سے شروع
اسلام آباد (سپورٹس رپورٹر )پاکستان شاہینز اور سری لنکا اے کے درمیان دو میچوں کی سیریز کا پہلا چار روزہ میچ آج سے راولپنڈی سٹیڈیم میں شروع ہوگا۔چار روزہ میچز صبح ساڑھے 9 بجے شروع ہونگے ۔
شاہینز کی کپتانی محمد ہریرہ کرینگے ، جو پہلی بار ٹیم کی قیادت کریں گے جبکہ سری لنکا اے کے چار روزہ میچوں میں کپتان پاسندو سوریابندارا ہوں گے جبکہ نووانیڈو فرنینڈو ون ڈے سیریز میں قیادت کرینگے ۔چار روزہ سکواڈ میں پانچ کرکٹرز حیدر علی، حسین طلعت، خرم شہزاد، محمد وسیم جونیئر اور روحیل نذیر پہلے ہی عالمی سطح پر پاکستان کی نمائندگی کر چکے ہیں۔ مزید برآں 14 رکنی سکواڈ میں سے چار کھلاڑی علی زریاب، محمد ہریرہ، محمد رمیز جونیئر اور سعد خان نے دو ماہ قبل اسلام آباد میں بنگلہ دیش اے کے خلاف چار روزہ سیریز میں حصہ لیا تھا۔محمد ہریرہ نے سیریز کے موقع پر پی سی بی ڈیجیٹل سے گفتگو کرتے ہوئے کہا کہ پاکستان شاہینز کی قیادت کرنا اعزاز کی بات ہے ۔ شاہینز کے لیے کھیلنا کھلاڑیوں کو اپنی صلاحیتوں کا مظاہرہ کرنے کا راستہ فراہم کرے گا ،مہمان کپتان پاسندو سوریابندارا نے کہاکہ جب سے ہم پاکستان پہنچے ہیں ہم نے یہاں کے لوگوں کی جانب سے بہت محبت اور مہمان نوازی دیکھی ہے ۔ ہمارے پاس مضبوط بیٹنگ لائن اپ کے ساتھ اچھی ٹیم ہے اور ایک اچھا بولنگ اٹیک بھی ہے ،ہمارے ذہن میں ایک وقت میں ایک گیم ہے اور ہم سیریز میں اچھی کارکردگی کا مظاہرہ کرنا چاہتے ہیں۔
