انڈر19ایشیاکپ:سیمی فائنل میں پاکستان کو شکست
دبئی (سپورٹس ڈیسک )انڈر-19 ایشیاکپ کے پہلے سیمی فائنل میں بنگلہ دیش نے ٹورنامنٹ کے ناقابل شکست پاکستان کو 7 وکٹوں سے ہرا کر فائنل کیلئے کوالیفائی کرلیا۔
دبئی میں کھیلے جارہے ایونٹ کے پہلے سیمی فائنل میں بنگلہ دیش کے بالرز نے پاکستانی بیٹرز کو ریت کی دیوار بناڈالا اورپوری ٹیم 37 اوورز میں 116رنز بناکر آؤٹ ہوگئی، قومی ٹیم کے اوپنرز سمیت 4 بیٹر صفر پر پویلین روانہ ہوئے جبکہ مڈل آرڈر بیٹر فرحان یوسف 32 رنز بناکر ٹاپ سکورر رہے ۔قومی کپتان سعد بیگ 18، محمد ریاض اللہ 28، ہارون ارشد 10 اور فہام الحق 8 رنز بناسکے ۔بنگال ٹائیگرز کی جانب سے اقبال حسین نے 4، معروف مریدا نے 2 کھلاڑیوں کو پویلین کی راہ دکھائی۔ہدف کے تعاقب میں بنگلہ دیش کا آغاز اچھا نہ تھا تاہم کپتان عزیز الحکیم نے 61 رنز کی اننگز کھیل کر ٹیم کو 23ویں اوور میںفتح یاب کروایا، آؤٹ ہونے والے کلام صدیقی صفر، زواد عباس 17 اور محمد شیلاب 26 رنز بناکر پویلین لوٹے جبکہ دوسرے سیمی فائنل میں بھارت نے سری لنکا کو شکست دے کر فائنل کیلئے کوالیفائی کرلیا ہے ۔
