ویسٹ انڈیز اور پاکستان شاہینز کا سہ روزہ وارم اپ میچ ڈرا
اسلام آباد(سپورٹس رپورٹر )ویسٹ انڈیز اور پاکستان شاہینز کے درمیان کھیلا گیا سہ روزہ وارم اپ میچ ڈرا ہوگیا۔
اسلام آباد کلب میں جب تیسرے دن کھیل ختم ہوا تو پاکستان شاہینز نے 312 رنز کے ہدف کے تعاقب میں 2 وکٹوں پر 128 رنز بنائے تھے ۔ تیسرے دن کے کھیل کی خاص بات محمد ہریرہ کی شاندار بیٹنگ تھی جنہوں نے 12 چوکوں اور 2 چھکوں کی مدد سے 80 رنز سکور کئے ، محمد ہریرہ نے پہلی اننگز میں بھی عمدگی سے بیٹنگ کرتے ہوئے 74 رنز سکور کیے تھے ۔محمد ہریرہ نے عمیر بن یوسف کے ساتھ پہلی وکٹ کی شراکت میں 82 رنز کااضافہ کیا۔ عمیر نے 25 رنز سکور کیے ۔جومل واریکن نے دو وکٹیں حاصل کیں۔اس سے قبل ویسٹ انڈیز نے اپنی دوسری اننگز 40 اوورز کی بیٹنگ میں 5 وکٹوں پر 177 رنز بناکر ڈکلیئر کردی تھی۔ پہلی اننگز میں 99 رنز سکور کرنے والے الیک اناتھاز 7 چوکوں اور 2 چھکوں کی مدد سے 58 رنز ناٹ آؤٹ کے ساتھ نمایاں رہے ۔ٹیون املاچ نے 9 چوکوں کی مدد سے 57 رنز سکور کیے اور وہ بھی آؤٹ نہیں ہوئے ۔ ان دونوں نے چھٹی وکٹ کی ناقابل شکست شراکت میں 104 رنز کا اضافہ کیا۔ کیون ہوج نے 36 رنز کی اننگز کھیلی۔موسیٰ خان اور علی رضا نے دو دو وکٹیں حاصل کیں۔یاد رہے کہ ویسٹ انڈیز نے پہلی اننگز میں 8 وکٹوں پر346 رنز بنائے تھے جبکہ پاکستان شاہینز نے اپنی پہلی اننگز میں 9 وکٹوں پر 212 رنز سکور کیے تھے ۔پاکستان اور ویسٹ انڈیز کے درمیان پہلا ٹیسٹ 17 جنوری سے ملتان میں کھیلا جائے گا۔
