چیمپئنزٹرافی :پاکستانیوں کیلئے دبئی ویزا کی شرائط نرم نہیں ہونگی

لاہور(سپورٹس ڈیسک ) آئی سی سی چیمپئنز ٹرافی کے دبئی میں شیڈول میچز کیلئے پاکستانیوں کیلئے ویزا کی شرائط نرم نہیں ہونگی ۔۔
جبکہ پاکستان میں شیڈول چیمپئینز ٹرافی کے میچز کیلئے ٹکٹوں کی قیمت سامنے آگئی ہے ، دبئی میں شیڈول بھارت کے میچز پر ٹکٹس ڈالرز میں فروخت کرنے پر اتفاق ہوا ہے جبکہ پاکستان میں ٹکٹوں کی قیمت پاکستانی روپے میں رکھی جائیں گی،نجی ٹی وی کے مطابق چیمپئینز ٹرافی کیلئے ویزا پالیسی پر بورڈ کے اعلیٰ حکام کی مشاورت جاری ہے ، پاکستان میں شیڈول چیمپئینز ٹرافی کیلئے ٹکٹوں کی فروخت اگلے ہفتے شروع ہونے کا امکان ہے جبکہ مفت پاسز پر پابندی لگ گئی ہے ،ذرائع کے مطابق ٹکٹ خریدنے والا ہی چیمپئینز ٹرافی کے میچز دیکھ سکے گا اور انٹرنیشنل کرکٹ کونسل کی گائیڈ لائن کے تحت تمام ٹکٹس آن لائن فروخت ہونگے اور کوئی ٹکٹ بوتھ نہیں بنائے جائیں گے ۔پاکستانی شائقین لوکل کرنسی میں ٹکٹ خرید سکیں گے ، غیرملکی ڈالرر، پاونڈز اور یورو میں ادائیگی کرینگے ۔ذرائع کا کہنا ہے کہ سستا ترین ٹکٹ ایک ہزار کا ہوگا، مہنگا ترین ٹکٹ 25 ہزار روپے میں رکھا جارہا ہے ، پاکستان اور بھارت کے میچ کی ٹکٹ زیادہ مہنگے ہونگے ، ان کی ٹکٹس کی قیمت ایک دو روز میں فائنل ہوجائے گی۔ پہلے مرحلے میں گروپ میچز کے ٹکٹس خریدے جاسکیں گے ، سیمی فائنل اور فائنل کے ٹکٹس بعد میں فروخت ہونگے ،دبئی جانے کے خواہش مند پاکستانیوں کیلئے ویزا پالیسی میں زیادہ نرمی نہیں ہو گی، جو پہلے دبئی جاچکے ہیں، ان کو ہی ویزے ملنے کا امکان ہے جبکہ ویزا لینے کیلئے ٹکٹس اور ٹریول ہسٹری دیکھی جائے گی۔