ڈیوڈ وارنر کی تیلگو بولنے اور ڈانس کرنے کی ویڈیو وائرل
لاہور(سپورٹس ڈیسک )آسٹریلوی کرکٹر ڈیوڈ وارنر کی تیلگو بولنے اور ڈانس کرنے کی ویڈیو وائرل ہو گئی۔
ڈیوڈ وارنر ٹالی ووڈ (تیلگو فلم انڈسٹری) کا حصہ بننے جا رہے ہیں اور جلد ہی اپنی پہلی بھارتی فلم رابن ہڈ میں کیمیو (مہمان کردار) کرتے نظر آئیں گے ۔پری ریلیز ایونٹ میں وارنر نے مداحوں سے تیلگو میں بات کی تو سب حیران رہ گئے ۔انہوں نے کہا کہ نمستے آپ سب کا شکریہ، میں دل کی گہرائیوں سے آپ سب کی محبت اور حمایت کی قدر کرتا ہوں، آپ لوگوں نے پچھلے 15 سال میں جو سپورٹ دی وہ میرے لیے بہت خاص ہے ۔جب ڈائریکٹر وینکی کودمولا نے وارنر سے تیلگو میں کچھ اور بولنے کو کہا تو انہوں نے شرماتے ہوئے کہا: نِنا نینو پریمیستونانو" (میں تم سے محبت کرتا ہوں)۔وارنر نے اپنے فلمی ڈیبیو پر بات کرتے ہوئے کہا کہ میں کرکٹ کے میدان سے نکل کر فلم انڈسٹری میں آنے پر گھبرا رہا تھا، لیکن جب ڈائریکٹر وینکی اور پروڈکشن ہاؤس نے مجھ سے رابطہ کیا تو میں نے سوچا کہ یہ ایک زبردست موقع ہے ، میں نے ہیروئن سری لیلا سے بھی بات کی اور میں اس موقع کو حاصل کر کے واقعی خوش ہوں۔
