لاہور قلندرز نے پشاور زلمی کو ہرا کر پی ایس ایل سے باہر کر دیا
راولپنڈی (سپورٹس رپورٹر )پی ایس ایل 10 کے 29 ویں میچ میں لاہور قلندرز نے پشاور زلمی کو ہرا کر ایونٹ سے باہر کردیا۔
راولپنڈی میں بارش سے متاثرہ 13 اوورز کے سنسنی خیز میچ میں لاہور قلندرز نے 8 وکٹ پر 149رنز سکور کیے اور پشاور زلمی کو جیت کیلئے 150 رنز کا ہدف دیا۔پشاور زلمی کی ٹیم 150 رنز کے ہدف کے تعاقب میں 123 رنز ہی بنا سکی۔زلمی کی ٹیم پہلی بار پی ایس ایل کے پہلے راؤنڈ میں ایونٹ سے باہر ہوئی ہے ۔پشاور زلمی نے لاہور قلندرز کے خلاف ٹاس جیت کر فیلڈنگ کا فیصلہ کیا تو لاہور قلندرز کے فخر زمان اور محمد نعیم نے زبردست آغاز کیا، دوسرے اوور میں ہی 21 رنز بنا لیے ،فخر زمان نے 60 رنز کی شاندار اننگز کھیلی، پشاور زلمی کے فیلڈرز نے ناقص کارکردگی کا مظاہرہ کرتے ہوئے 4 آسان کیچ چھوڑے ، جن میں سب سے مہنگا کیچ فخر زمان کا تھا جس نے ان کی اننگز کو طول دیا۔قلندرز کی اننگز کے آخری حصے میں وکٹیں گرنے کا سلسلہ شروع ہوا اور ٹیم کا اسکور 160 سے زائد جانے کے امکانات کو دھچکا لگا، کوشال پریرا اور آصف علی نے درمیانی اوورز میں اہم کردار ادا کیا، لیکن آصف علی 18 رنز کی مختصر مگر تیز اننگز کے بعد آؤٹ ہو گئے ، شکیب الحسن بغیر کوئی رن بنائے آؤٹ ہو گئے ۔لاہور قلندرز کے فخر زمان نے 60، محمد نعیم نے 22، آصف علی نے 18، کوشال پریرا نے 17 رنز بنائے ، پشاور زلمی کے بولر احمد دانیال، علی رضا اور ڈینیئل سیمز نے دو، دو کھلاڑیوں کو آؤٹ کیا۔اس سے قبل راولپنڈی سٹیڈیم کے اطراف تیز آندھی کے باعث لاہور قلندرز اور پشاور زلمی کے درمیان میچ کے ٹاس میں تاخیر ہوئی تھی، جس کے بعد میچ تاخیر سے 9 بج کر 45 منٹ پر شروع ہواتھا۔ لاہورقلندرکے سلمان مرزا 31رنزدیکر 4وکٹیں لینے پرپلیئرآف دی میچ قرارپائے ،قبل ازیں 28ویں میچ میں قبل ازیں کو ئٹہ گلیڈی ایٹرز نے ملتان سلطانز کو 2 وکٹوں سے شکست دی ، گلیڈی ایٹرز نے ملتان سلطانز کیخلاف 186رنز کا ہدف آخری گیند پر پورا کیا۔ حسن نواز نے 67رنز کی ناقابل شکست اننگز کھیلی اورمین آف دی میچ قرار پائے ۔علاوہ ازیں پی ایس ایل کا آخری لیگ میچ آج اسلام آباد یونائیٹڈ اور کراچی کنگز کے درمیان کھیلا جائے گا۔
