کوہلی نے ٹیسٹ کرکٹ سے ریٹائرمنٹ پر خاموشی توڑ دی
ممبئی (سپورٹس ڈیسک)بھارتی کرکٹ ٹیم کے سابق کپتان ویرات کوہلی نے ٹیسٹ کرکٹ سے ریٹائرمنٹ پر خاموشی توڑ دی۔ویرات کوہلی نے ٹیسٹ کرکٹ سے ریٹائرمنٹ پر پہلی بار کھل کر بات کی ہے۔۔۔
انہوں نے اپنے خیالات کا اظہار یووراج سنگھ کی فلاحی تنظیم کیلئے لندن میں فنڈ ریزنگ ڈنر تقریب میں کیا ۔تقریب کے دوران جب میزبان نے کوہلی سے کہا کہ سب لوگ انہیں میدان میں یاد کر رہے ہیں، تو ویرات نے مسکراتے ہوئے کہا کہ میں نے دو دن پہلے اپنی داڑھی رنگی ہے اور جب ہر چار دن میں داڑھی رنگنی پڑے تو سمجھ لیں کہ وقت آ چکا ہے ۔ویرات کوہلی نے اپنے سابق کوچ روی شاستری کے ساتھ اپنے تعلقات پر روشنی ڈالتے ہوئے کہا کہ اگر میں روی بھائی کے ساتھ نہ ہوتا تو جو کچھ میں نے ٹیسٹ کرکٹ میں حاصل کیا وہ ممکن نہ ہوتا، ہم دونوں کے درمیان جو کلیئرٹی اور اعتماد تھا وہ کسی نعمت سے کم نہیں، کوہلی نے یووراج بارے کہا کہ ہماری دوستی صرف میدان تک محدود نہیں تھی، میں نے ان سے بہت کچھ سیکھا، وہ مجھے ٹیم میں لے کر چلے ، اعتماد دیا اور زندگی کے کئی پہلوؤں سے روشناس کرایا، یہ سب لمحے میرے دل کے بہت قریب ہیں۔
