ہاکی باتوں سے ٹھیک نہیں ہوگی،سہولیات دی جائیں:عماد بٹ
لاہور(سپورٹس ڈیسک )قومی ہاکی ٹیم کے کپتان عماد بٹ نے کہاہے کہ ہاکی باتوں سے ٹھیک نہیں ہوگی، ہمیں سہولیات دی جائیں، فیڈریشن نے ابھی تک ہمارے واجبات ادا نہیں کیے ہیں۔
میڈیا سے گفتگو میں انہوں نے کہاکہ ایشیاکپ کے لیے خودکو تیار کر رہے ہیں، اس وقت تیاری بڑی اچھی ہے ، ہمارے لئے ایشیاکپ بڑا اہم ٹورنامنٹ ہے ، ایشیا کپ ورلڈکپ کا کوالیفائنگ راؤنڈ بھی ہے ، ایشیا کپ میں شرکت کے حوالے سے فیڈریشن نے حکومت سے بات کی ہے ، جو فیصلہ ہوگا اسی پر عمل کرینگے ، میں سمجھتا ہوں کہ اس وقت بھارت جانا ہمارے لیے خطرے سے خالی نہیں۔ فیڈریشن نے ابھی تک ہمارے واجبات ادا نہیں کیے ہیں، جو کمٹمنٹ ہو اس کو پورا کیا جانا چاہیے ، جو میری آڈیو لیک ہوئی ہے اس پر غور و فکر کرنا چاہیے ، میں سمجھتا ہوں کہ فیڈریشن کے پاس ابھی بجٹ نہیں ہے ۔ہمارے پاس ایسا بیک اپ موجود ہے کہ ہم کسی بھی ٹیم کو ہرا سکتے ہیں، ہماری سہولیات کو بہتر کرنا چاہیے ، فیڈریشن کو اپنے وعدے پورے کرنے چاہئیں، وزیراعظم سے درخواست کی تھی کہ ڈیپارٹمنٹس کی ٹیمیں بحال کر دیں تاکہ کھلاڑیوں کو روزگار ملے ۔ کھلاڑیوں کی بغاوت کے حوالے سے باتیں سننے کو مل رہی ہیں، ابھی ایسی کوئی بات مکمل نہیں ہے جب اس بارے میں فیصلہ ہوگا تو پتہ چل جائے گا ، آڈیو میں جو باتیں میں نے کی ہیں ان پر قائم ہوں،کھلاڑیوں کے ساتھ کیے گئے کمٹمنٹس کو پورا کیا جائے ، اگر ضرورت پڑی تو دوبارہ بھی ایسی بات کروں گا۔
