مریم نواز کی زیر صدارت خصوصی اجلاس:غیر قانونی ہاؤسنگ سوسائٹیز کے خاتمے کیلئے اتھارٹی بنانیکا فیصلہ
راولپنڈی، لاہور (نیوزرپورٹر، دنیا نیوز،خبر ایجنسیاں)وزیر اعلیٰ پنجاب مریم نوازشریف کی زیر صدارت ہاؤسنگ سوسائٹیز کے حوالے سے خصوصی اجلاس ہوا جس میں کمرشل اور رہائشی علاقوں کے الگ الگ یکساں کلر اور ڈیزائن کی تجویز کا جائزہ لیا گیا۔
ہاؤسنگ سوسائٹیز میں گھروں کو ماحول دوست،واک ایبل اور جدید تقاضوں کے مطابق بنانے کی سفارشات پر غورکیا گیا۔ وزیراعلیٰ نے ہاؤسنگ سیکٹر کی زیر التوا درخواستوں کو فوری نمٹانے کا حکم دیا۔ وزیراعلیٰ نے لاہور ڈویلپمنٹ پلان پر پیش رفت کا جائزہ لینے کے لئے روزانہ کی بنیاد پر تفصیلی رپورٹ طلب کر لی ۔ غیر قانونی ہاؤسنگ سوسائٹیزکے سدباب کیلئے پنجاب سپیشل پلاننگ اتھارٹی قائم کرنے کا اصولی فیصلہ کیا گیا۔ کمرشل،رہائشی اور زرعی زمینوں کی زوننگ کی جائے گی۔ اتھارٹی ڈسٹرکٹ لینڈ یوز پلان اور زوننگ کرے گی اور ہر چار سال میں ریویو کیا جائے گا۔ اجلاس میں ہراضلاع میں ڈسٹرکٹ سپیشل پلاننگ کمیٹی کے قیام پر اتفاق کیا گیا۔ متعلقہ ڈپٹی کمشنر کمیٹی کے سربراہ ہوں گے ۔ واپڈا،سوئی گیس،واسا سمیت سروسز فراہم کرنے والے دیگر اداروں کے نمائندے بھی شامل ہوں گے ۔ اراضی کا غیر قانونی استعمال روکنے کیلئے وائلیشن ٹریکنگ میکنزم بھی دیا جائے گا۔
ڈسٹرکٹ ڈیجیٹل وال کے ذریعے اراضی کے غلط استعمال کی نشاندہی ہو گی۔ ڈیجیٹل ڈیٹا کی بنیاد پردرخواستوں کی فاسٹ ٹریک پر منظوری کا فیصلہ بھی کیا جا سکے گا۔وزیر اعلیٰ نے کہا ٹاؤن پلاننگ مستحکم مستقبل کی ضمانت ہوتی ہے ۔ناقص حکمت عملی کی وجہ سے اربن ایریاز میں بے ہنگم غیرقانونی ہاؤسنگ سوسائٹیاں بن رہی ہیں۔ وزیر اعلیٰ کو بریفنگ میں بتایا گیا لاہور ڈویلپمنٹ پلان میں ای ٹینڈرنگ کی وجہ سے کروڑوں روپے کی بچت ممکن ہوئی۔لاہور ڈویلپمنٹ پلان کے فیز ون کے تحت 414سکیموں پر پیش رفت کی رپورٹ پیش کی گئی۔ مریم نواز نے راولپنڈی رنگ روڈ کا اچانک دورہ کیا اور منصوبے کا دائرہ بڑھانے کی ہدایت کی۔وزیر اعلیٰ نے رنگ روڈ منصوبہ دسمبر تک مکمل کرنے کی ڈیڈ لائن دی اور منصوبے کا فضائی جائزہ بھی لیا ۔وزیراعلیٰ نے کہا 38 کلومیٹر سے زائد طویل منصوبے کی تکمیل سے ٹریفک کا دیرینہ مسئلہ حل ہو گا،معاشی اور کاروباری سرگرمیوں میں بھی اضافہ ہوگا۔ رنگ روڈ کی تکمیل سے لاکھوں شہریوں کو سفر میں آسانی ملے گی۔