کولمبیا میں دنیا کی تیزرفتار، انقلابی تھری ڈی خوردبین تیار
کولمبیا یونیورسٹی میں ایک انقلابی تھری ڈی خوردبین (مائیکروسکوپ) تیار کی گئی ہے جسے دنیا کی سب سے تیز رفتار خوردبین کہا جاسکتا ہے
نیویارک(نیٹ نیوز)کولمبیا یونیورسٹی میں ایک انقلابی تھری ڈی خوردبین (مائیکروسکوپ) تیار کی گئی ہے جسے دنیا کی سب سے تیز رفتار خوردبین کہا جاسکتا ہے ۔اس ایجاد سے جینیات، امراضِ قلب، حیاتیاتی تحقیق اور نیوروسائنس میں انقلاب آجائے گا۔ اس کے ذریعے دماغی نیورون کی فائرنگ کا بھی جائزہ لیا جاسکتا ہے ۔کولمبیا یونیورسٹی سے وابستہ سائنسداں ایلزبتھ ہِلمان کہتی ہیں کہ اگر ہم خوردبینی تصویر کشی کے عمل کو تیز بنادیں تو اس سے پورے حیاتیاتی نظام کا جائزہ لیا جاسکتا ہے اور یہ روایتی خوردبین کے مقابلے میں بہت فائدہ مند عمل ہوگا۔ اس خوردبین کا پورا نام سویپٹ کونفوکلی الائنڈ پلینر ایکسائٹیشن یا سکیپ مائیکروسکوپ ہے ۔ اس سے زندہ بافتوں اور حیاتیاتی نظاموں کی تصویر کشی کی جاسکتی ہے ۔ اب نئے نظام کے تحت لیزر ایک خاص زاویے سے پھینکی جاتی ہے جو پھیل کر ایک بڑے رقبے کو روشن کرتی ہے ۔ اس طرح روشنی پھیل کر کسی حیاتی نمونے کا تھری ڈی نقش بناتی ہے ۔ خوردبین میں ایک ہی متحرک آئینہ ہے جو روشنی کو ہر طرف سے جمع کرکے مطلوبہ شے کا تھری ڈی نقشہ بناتا ہے ۔ واضح رہے کہ یہ منصوبہ دنیا بھر کے کئی ممالک نے مشترکہ طور پر تیار کیا ہے اور اب پوری دنیا کے ماہرین اس سے فائدہ اٹھارہے ہیں۔
