غیر قانونی تارکینِ وطن

پرنس ولیم کاؤنٹی میں ہمارے گھر سے کوئی دو میل دْور ایک سیون الیون ہے۔ روٹ ون کے آس پاس رہنے والے بیشتر لاطینو ہر صبح اس کارنر سٹورکے گرد جمع ہو جاتے ہیں۔ کوئی کافی لیتا ہے۔ کوئی پیزا کھاتا ہے اور کوئی کھلونے خریدتا ہے‘ اور جنوبی امریکہ کے کسی ملک میں اپنے بچوں کو بھیجنے کی امید کرتا ہے۔ یہ سب دیہاڑی دار ہیں۔ ایک مالک مکان اپنی موٹر میں آتا ہے، مزدور اس کی طرف بڑھتے ہیں اور وہ ان میں سے دو ایک کو چھانٹ کر اپنے ساتھ لے جاتا ہے۔ کارکن‘ مالک کی چھت بناتا ہے‘ اس کے گھر کی چاردیواری کی مرمت کرتا ہے‘ اس کی کھڑکیاں بدلتا ہے اور آٹھ گھنٹے کا محنتانہ وصول کرنے کے بعدچل دیتا ہے۔ دیہاڑی دار مزدوروں کے ایسے چھوٹے بڑے غیر سرکاری مراکز ہر گلی کوچے میں واقع ہیں اور دوسرے شہروں میں بھی ہوں گے مگر جب سے ڈونلڈ ٹرمپ نے تارکین وطن کو جرائم پیشہ قرار دے کر اپنی صدارتی مہم کا آغاز کیا ہے‘ ان ٹھکانوں کی رونق ماند پڑ گئی ہیں۔

صدر ٹرمپ نے غیر قانونی امی گرینٹس کی پکڑ دھکڑ کی جو وارننگ دی تھی اس کا اثر عظیم تر واشنگٹن میں دکھائی دے رہا ہے اور اس کے لئے لوگ ‘ امی گریشن انفورسمنٹ ایجنسی (ICE ) کے ان متعصب کارکنوں کے شکر گزار ہیں جو غیر قانونی تارکین وطن پر جھپٹنے کے لئے '' اوپری‘‘ اشارے کے منتظر رہتے ہیں۔ اب بہت کم لوگ خواہ وہ قانونی طور پر اس ملک میں مقیم ہوں ان سٹوروں اور شاپنگ سنٹروں کا رخ کرتے ہیں جو ایک مہینہ پہلے ان کے دم قدم سے آباد و شاد تھے۔ نتیجہ: اس علاقے کی اکو نو می یا پیداوار اورخدمات ویران ہیں۔ جو اس ملک کے شہری ہیں یا گرین کارڈ پر ہیں وہ شادی غمی یا وا لدین سے ملنے کے لئے آبائی وطن جانے سے گھبراتے ہیں‘ مبادا واپسی کے لئے دشواریاں پیدا ہوں۔ امریکی ہیرو کے فرزند محمد علی جونیئر سے جمیکا سے واپس آتے ہوئے جو سلوک روا رکھا گیا‘ وہ سب کے سامنے ہیں۔

گورنر نے‘ جو ڈیمو کریٹ ہیں‘ تارکین وطن سے یک جہتی کے اظہار کے لئے جس سٹور کا انتخاب کیا وہ سیون الیون یا لاطینو دکان نہیں بلکہ ایک پاکستانی کا سٹور تھا‘ جو قانونی ہے۔ ثاقب چوہدری اور اس کا خاندان شمالی ورجینیا میں ایسے سٹوروں کے ایک سلسلے کے مالک ہیں۔ اس نے بتایا کہ وہ ایک اور سٹور کھولنے والے تھے مگر نئے صدر کا حکم آنے پر ملتوی کر دیا۔ گورنر صاحب بولے'' کا روبار بہت مندا ہے۔ذرا دیکھو تو‘‘۔ ڈیموکریٹک پارٹی نے ایک لاطینو اور ایک مسلمان کو جماعت کے دونوں بڑے عہدوں پر فائز کر دیا ہے۔ وہ دونوں کانگرس کے رکن ہیں۔ ثاقب کی دکان پر لاطینو کم آتے ہیں مگر میکسیکو کا ایک شہری وہاں موجود تھا جو ترکھان ہے اور کا م کاج کی تلاش میں اس طرف نکل آیا تھا۔ ہولیو امنزر نے‘ جو خودقانونی طور پر مقیم ہے‘ کہا:حالت بڑی خراب ہے اور لوگ سہمے ہوئے ہیں۔ بعض بالغ انگریزی زبان کی کلا سوں میں نہیں جاتے اور بعض نے آئس (ICE ) کے ڈر سے اپنے بچوں کو سکول سے اٹھا لیا ہے حالانکہ یہ بچے امریکہ میں پیدا ہوئے تھے۔ان سے متعلق یا ان کے غیر قانونی والدین کی حفاظت کی پالیسی اوبا ما کے دور سے چلی آ رہی ہے۔

امی گریشن(ترک وطن یا نقل مکانی) کی اصطلا حات یا ان کے اردو ترجمے بکثرت آ رہے ہیں۔ کیوں نہ پاکستانی قارئین کو‘ جو اس عمل سے نہیں گزرے یا گزرنے والے ہیں‘ ان مصطلحات کے معنی بتا دوں جو میری سمجھ میں آ تے ہیں۔ وزٹ ویزا: عارضی طور پر امریکہ آنے والوں کو یہی ویزا دیا جاتا ہے خواہ وہ H-1B کام کا اجازت نامہ ہو یا کانگرشنل فیلو شپ۔ سیر و سیاحت کا ویزا دستیاب ہے مگر ویزا افسر کو پتہ ہوتا ہے کہ امیدوار امریکہ میں ہوٹل اور کھانے پینے کے اخراجات برداشت کر سکتا ہے یا نہیں۔ ویزا افسر کا فیصلہ آ خری ہو تا ہے۔ جو '' خوش نصیب‘‘ امریکہ میں لا پتہ ہو جاتا ہے وہ مستقل رہائش (گرین کارڈ) کے لئے درخواست کر سکتا ہے۔ اکثر لوگ گرین کارڈ پر رہنے کو ترجیح دیتے ہیں۔ اگر کوئی شہریت (citizenship) کی درخواست دینا چا ہے تو اسے کم سے کم دس سال انتظار کرنا ہو گا۔ پاکستانی چونکہ ہوائی جہازوں میں امریکہ آتے ہیں اس لئے گمشدگی کی صورت میں ان کا پتہ لگانا آسان ہوتا ہے۔ان کی تعداد لاطینو کے مقابلے میں کچھ نہیں جو بسوںاور ریل گاڑیوں میں سفر کرتے ہیں اور بعض اوقات پیدل چل کر اس ملک میں داخل ہوتے ہیں۔ تفصیل کے لئے سٹیٹ ڈیپارٹمنٹ کی ویب سائٹ دیکھئے یا فارم بھروانے کے لئے کسی واقف کار یا اٹارنی (وکیل ) سے رجوع کیجئے گا۔

لاطینی یا ہسپانوی زبان بولنے والوں کی تعداد ایک کروڑ سے تجاوز کر چکی ہے۔ حکومت اور اکثر اوقات ان سے ہمدردی رکھنے والے ذرائع ابلاغ انہیں سفری دستاویز کے بغیر immigrants undocumentedکہتے ہیں۔ یہ لوگ زیا دہ تر غیر قانونی ہیں اورہیٹی‘ ونیز ویلا‘ کولمبیا‘ گوئٹے مالا‘ بولیویا‘ پیرو اور یوراگوئے سے آتے ہیں۔ وہ اب تک امریکہ کو آباد کا روں کی جنت خیال کرتے ہیں۔ انہیں نہیں معلوم کہ نیو یارک کی بندرگاہ پر ایلس آئی لینڈ اب ایک عجائب گھر کی شکل اختیار کر چکا ہے۔ امریکہ کے کچھ قوانین ہیں جو ویزا کے بغیر سرحد پار کرنے کی ممانعت کرتے ہیں۔ کون سی سرحد؟ قبائلیوں کی طرح وہ اس ڈیورنڈ لائن کو نہیں مانتے۔ روز گار کی تلاش میں ادھر اْدھر جانا وہ اپنا حق سمجھتے ہیں۔ ان میں چند ایک جرائم پیشہ بھی ہیں جو ٹرمپ کے نشانے پر ہیں۔ جنوبی ایشیا کے لوگ خواہ مخواہ ان جرائم پیشہ افراد کے ہتھے چڑھ جاتے ہیں جیسا کہ جنوبی ہند سے آئے ہوئے ایک سافٹ ویئر انجینئر کے ساتھ ہوا ۔ کسی نے '' نفرت‘‘ کے ساتھ اسے کینسس کی ایک کلب میں گولی ماری اور مار ڈالا۔

ثاقب چوہدری کے سٹوروں کی خصوصیت حلال گوشت ہے مگر جو چند لاطینو ان دکانوں کا رخ کرتے ہیں انہیں گوشت کی حلت اور حرمت کے فرق کا کیا پتہ‘ وہ گروسری خریدنے کے بعد گوشت کے کاؤنٹروں کی طرف بڑھتے ہیں اور بکرے کی بوٹیاں یا چکن لے کر چل دیتے ہیں۔ وہ خشخا ش کا پیسٹ‘ آم کا جوس اور باسمتی کے تھیلے بھی خریدتے ہیں۔

آئس (ICE )نے ان ہفتوں کے دوران ہزاروں افراد کو غیرقانونی طور پر امریکہ میں رہائش اختیار کرنے اور چھوٹے موٹے کام دھندے اپنانے پر گرفتار کیا ہے۔ ان میں اس سیون الیون پر اکٹھے ہونے والے لاطینو بھی تھے۔ ٹرمپ کا حکم نامہ کہ جرائم پیشہ لوگوں کے علاوہ غیر قانونی تا رکین کو کس طرح ہدف بنایا جائے متعصب اور جوشیلے اہل کاروں کے کام آ رہا ہے۔واشنگٹن کے علاقے اور باقی ملک میں تارکین وطن میں پریشانی کی لہر اسی حکم نے دوڑائی ہیں۔ ٹرمپ نے مسلم اکثریت کے ملکوں سے امریکہ آنے پر پابندی کا حکم نامہ دوبارہ جاری کیا ہے۔ عراق کو نکال دیا گیا ہے۔ اب یہ حکم ایسے ملکوں پر محیط ہے جو متحارب ہیں یا زیر قبضہ‘ پاکستان‘ سعودی عرب‘ مصراور افغانستان ان میں شامل نہیں مگر ایران ہے۔اس حکم نامے کو قانونی چیلنج کرنے والوں کی بھی کمی نہیں۔ علاوہ ازیں پناہ گزینوں کا پروگرام معطل کر دیا گیا ہے۔ امریکہ سال میں پچاس ہزار سے زیادہ لوگوں کو بسانے کا ذمہ دار نہ ہوگا۔ اوباما نے یہ تعداد ایک لاکھ دس ہزار رکھی تھی۔

ایڈون‘ جو گوئٹے مالا کا رہنے والا ہے‘ آئس کے ڈر کے مارے اپنا آخری نام بتانے سے انکار کرتا ہے مگر بیس سال سے باس ملک میں پڑا ہے اور چھوٹی موٹی نو کری کے لئے اپنی کوشش جاری رکھے گا۔ وہ اس خیال کا حامی ہے کہ امریکی معیشت اْس جیسے لوگوں پر انحصار کرتی ہے۔ جب سے صدر ٹرمپ نے سخت گیر پالیسی کا تاثر عام کیا ہے روزانہ پانچ سو افراد صرف میکسیکو سٹی جانے والے ہوائی جہازوں پر ڈالے جارہے اور ان میں سے کئی اپنے بچوں اور ملازمتوں کو پیچھے چھوڑ کر ملک بدر deport کئے گئے ہیں۔