بائیسویں پارے کا خلاصہ

قرآن پاک کے بائیسویں پارے کا آغازسورہ احزاب سے ہوتا ہے۔ سورہ احزاب کے آغاز میں اللہ تعالیٰ نے امہات المومنین سے مخاطب ہو کر فرمایا ہے کہ جو کوئی بھی امہات المومنین میں سے اللہ اور اس کے رسولﷺ کے لیے اپنے آپ کو وقف کرے گا اور نیک اعمال کرے گا‘ اللہ اس کو دو گنا اجر عطا فرمائے گا اور اس کے لیے پاک رزق کو تیار کردیا گیا ہے ۔

اس کے ساتھ ساتھ اللہ تعالیٰ نے امہات المومنین کو اس امر کی بھی تلقین کی کہ جب وہ کسی سے بات کریں تو نرم آواز سے بات نہ کیا کریں ‘تاکہ جس کے دل میں مرض ہے‘ وہ ان کی آوازوں کو سن کر طمع نہ رکھے اور معروف طریقے سے بات کریں اور اللہ تعالیٰ نے امہات المومنین کو اس امر کی بھی تلقین کی کہ وہ اپنی گھروں میں مقیم رہیں اور جاہلیت کی بے پردگی اور بنائو سنگھار کا اظہار نہ کریں اور نماز کو قائم کریں‘ زکوٰۃ کو ادا کریں اور اللہ اور اس کے رسول کی اطاعت کریں۔ بے شک اللہ تعالیٰ چاہتا ہے کہ نبی کے گھروالوں سے ناپاکی کو دور کرلیا جائے اور ان کو پاک صاف کر دیا جائے ۔

اس سورت میں اللہ تعالیٰ نے منہ بولے بیٹے کے مسئلے کو بھی واضح کیا کہ منہ بولا بیٹا حقیقی بیٹا نہیں ہوتااورساتھ ہی اللہ تعالیٰ نے اس امر کو بھی واضح فرمادیا کہ جناب رسول اللہ ﷺ کسی مرد کے باپ نہیں ‘ بلکہ اللہ کے رسول اور اس کے آخری نبی ہیں ۔

اس سورت میں اللہ تبارک و تعالیٰ نے مومنوں کو حکم دیا کہ وہ اللہ کا کثرت سے ذکر کیا کریں اور صبح شام اللہ تعالیٰ کے ذکر میں مشغول رہا کریں ۔

اس سورت میں اللہ تعالیٰ نے نبی کریم ﷺ کو حکم دیا کہ وہ اپنی بیویوں ‘بیٹیوں اور مومن عورتوں کو کہہ دیں کہ وہ جلباب کو اوڑھا کریں۔ جلباب سے مراد ایک ایسا لباس ہے ‘جس نے عورت کو سر کے بالوں سے لے کر پائوں کے ناخن تک ڈھانکا ہو اور صرف ایک آنکھ نظر آرہی ہو اور اس لباس کا مقصد یہ تھا کہ وہ پہچان لی جائیں اور کوئی ان کو تنگ نہ کرے۔

اس سورت میں اللہ تعالیٰ نے قیامت کے دن کے حوالے سے بتلا یا کہ جب قیامت کا دن آئے گا تو جہنمیوں کو اوندھے منہ جہنم کی آگ میں ڈالا جائے گا ۔اس موقع پر جہنمی یہ کہیں گے کہ اے کاش ہم نے اللہ اور اس کے رسول ﷺکی بات کو مانا ہو تا اور کہیں گے کہ ہم نے اپنے بڑوں اور سرداروں کی بات کو مانا‘ پس انہوں نے ہمیں گمراہ کر دیا اور کہیں گے کہ اے ہمارے پروردگار ان کو دو گناعذاب دے اور ان پر لعنت کو برسا۔

اس سورت میں اللہ تعالیٰ نے اہل ایمان کو اس بات کی نصیحت کی ہے کہ اے ایمان والو !تم ان کی طرح نہ ہوجائو‘ جنہوں نے موسیٰ کو تکلیف پہنچائی تو اللہ تعالیٰ نے ان لوگوں کی کہی ہوئی بات سے ان کی برأت ظاہر کردی اور وہ اللہ کے نزدیک بڑی وجاہت والے تھے ۔ اہل ایمان کی ذمہ داری ہے کہ وہ اپنے نبی کی تکریم کریں اور آپ کی ذات کا ہر ممکن دفاع کریں ۔

اس سورت میں سچی بات کہنے کے فوائد بھی بتلائے گئے کہ اگر بات سیدھی کی جائے تو معاملات سنور جاتے ہیں اور اللہ حق گو شخص کے گناہوں کو معاف فرما دیتے ہیں ۔

سورۃ الاحزاب کے بعد سورہ سبا ہے۔ سورہ سبا میں اللہ تعالیٰ ارشاد فرماتے ہیں کہ سب تعریفیں اللہ کے لیے ہیں ‘جس کے لیے آسمان و زمین میں موجود سب کچھ ہے اور اس کی حمد آخرت میں ہے او ر وہ باخبر حکمت والا ہے۔ وہ جانتا ہے‘ جو زمین میں جاتا ہے اور جو اس سے نکلتا ہے اور جو آسمان سے اترتا اور اس کی طرف چڑھتا ہے اور وہ رحمت کرنے والا اور بخشنے والا ہے ۔

اس سورت میں اللہ تعالیٰ نے جناب دائود اور سلیمان پر اپنے انعامات کا ذکر کیا کہ کس طرح اللہ تعالیٰ نے جناب دائود کے لیے پہاڑ اور پرندوں کو مسخر فرما دیا اور لوہے کو ان کے ہاتھوں میں نرم کر دیا تھا۔ اور جناب سلیمان ں کے لیے مہینے کے سفر پر آنے جانے والی ہوا ئوں کو مسخر فرمادیا تھا اور جنات کو ان کے احکامات کے تابع کر دیا تھا ۔

اس سورت میں اللہ تعالیٰ نے سبا کی بستی کا ذکر کیا ہے کہ یقینا سبا والوں کے لیے ان کے مقام ِ رہائش میں نشانی تھی کہ ان کے دائیں اور بائیں دو باغ تھے۔ اللہ تعالیٰ نے فرمایا کہ تم اپنے رب کی دی ہوئی روزی کھائو اور اس کا شکر ادا کرو کہ پاکیزہ شہر ہے اور گناہوں کو معاف کرنے والا رب ہے‘ لیکن انہوں نے روگردانی کی تو اللہ تعالیٰ فرماتے ہیں ہم نے ان پر ایک سخت امڈتا ہوا سیلاب بھیج دیا اور ان کے دونوں باغوں کو بد مزہ پھل‘ جھائو اور کچھ بیری والے باغوں میں بدل دیا ‘ہم نے ان کو یہ بدلہ ان کے کفر کی وجہ سے دیا تھا اور ہم صرف ناشکروں کو ایسا بدلہ دیتے ہیں ۔

اس سورت میں اللہ تبارک و تعالیٰ نے اس بات کابھی ذکر کیا کہ اللہ نے اپنے رسول محمد عربی ﷺ کو جمیع انسانیت کے لیے بشارت دینے والا اور ڈرانے والا بنا کر بھیجا ‘مگر لوگوں کی اکثریت اس بات کو نہیں جانتی۔

سورہ سبا کے بعد سورہ فاطر ہے ۔سورہ فاطر میں اللہ تعالیٰ بیان کرتے ہیں کہ تمام تعریفیں زمین اور آسمان بنانے والے اللہ کے لیے ہیں اس نے فرشتوں میں سے بھی رسول چنے ہیں۔ بعض فرشتے دو پروں والے بعض تین اور بعض چار پروں والے ہیں اور اللہ تعالیٰ اپنی خلقت میں جس طرح چاہتا ہے اضافہ کرتا ہے ۔بے شک اللہ تعالیٰ ہر چیز پر قادر ہے ۔جناب جبرئیل امین ؑ جو کہ فرشتوں کے سردار ہیں‘ ان کو اللہ تعالیٰ نے چھ سو پر عطا فرمائے ہیں ۔

اس سورت میں اللہ تعالیٰ نے ان گمراہ لوگوں کا بھی ذکر کیا کہ جن کو ان کے غلط اعمال بھی اچھے معلوم ہوتے ہیں اللہ تعالیٰ نبی رحمتﷺکو دلاسہ دیتے ہیں کہ آپ ان اعمال پر حسرت نہ کریں۔اللہ تعالیٰ کو پتا ہے جو یہ کرتے ہیں ۔اللہ تعالیٰ فرماتے ہیں دنیا میں جتنی عورتیں حاملہ ہوتیں اور جتنی بچوں کو جنتی ہیں اور جو کوئی بھی بوڑھا ہوتا ہے اور جس کی عمر کم ہوتی اللہ کو ہر بات کا علم ہوتا ہے ۔اس سورت میں اللہ تعالیٰ یہ بھی ارشاد فرماتے ہیں کہ اندھا اور بینا برابر نہیں ہو سکتے اور نہ ہی دھوپ اور چھائوں برابر ہو سکتے ہیں اور نہ ہی زندہ اور مردہ برابر ہو سکتے ہیں ۔اللہ تعالیٰ ارشاد فرماتے رہے ہیں کہ جو شخص ہدایت کے راستے پر ہو وہ گمراہ انسانوں کے برابر نہیں ہوتا ۔

سورہ فاطر کے بعد سورہ یٰس ہے ۔سورۃ یٰس میں اللہ تعالیٰ نے قرآن حکیم کی قسم کھا کر کہا بے شک محمد ﷺ رسولوں میں سے ہیں اور ان کا راستہ ہی سیدھا راستہ ہے۔ اس سورت میں اللہ تعالیٰ نے ارشاد فرمایا کہ جو لوگ کافر ہیں‘ ان کو ڈرایا جائے یا نہ ڈرایا جائے ان کے لیے برابر ہے‘ وہ ایمان نہیں لائیں گے۔ رسول کریم ﷺ اس کو ڈراتے ہیں جو کہ قرآن مجید کی پیروی کرتا اور اللہ تعالیٰ کے ڈر کو اختیار کرنے والا ہے ۔

اس سورت میں اللہ تعالیٰ نے ایک بستی کا ذکر کیا‘ جس میں اللہ تعالیٰ نے اپنے دو رسولوں کو بھیجا ‘لیکن بستی والوں نے ان کو جھٹلا دیا‘ تب اللہ تعالیٰ نے تیسرے رسول کو قوت عطا کی۔ان رسولوں نے کہا کہ ہم اللہ تعالیٰ کے بھیجے ہوئے ہیں‘ جس پر بستی والوں نے کہا کہ رحمان نے کچھ بھی نازل نہیں کیا اور معاذاللہ تم جھوٹ بول رہے ہو۔ بستی والوں کا مقابلہ کرنے کے لیے بستی کے ایک کنارے سے ایک شخص اٹھا اور اس نے کہا کہ اے میری قوم کے لوگو رسولوں کی پیروی کرو جو تم سے کچھ بھی طلب نہیں کر رہے اور وہ ہدایت پر ہیں۔ پھر کیا ہوا یہ سب کچھ تئیسویں پارے میں بیان ہوگا۔ اللہ تعالیٰ ہمیں قرآن مجید پڑھنے سمجھنے اور اس پر عمل کرنے کی توفیق دے۔ (آمین!)